新歡篇：「佢令我身心健康」
很多人說戀愛中的女人最靚，楊秀惠最近被踢爆與金融才俊Ray拍拖，雖然相戀僅1個月，但愛得如膠似漆，伊人無時無刻都將男友掛在口邊，問到拍拖是否很開心？她露出一副甜到漏的樣子，笑到幾乎收不到聲：「哈哈哈哈！OK啦！」她直言深被男友疼錫，在患病期間獲對方悉心照料，終於打動芳心：「之前同馬國男朋友分手，返到香港仲好Sad（傷心），不過佢（Ray）好關心我！知我病咗，竟然喺半個鐘內親自煮餸兼送到去我屋企，冬菇、菜同魚嚟到仲係熱嘅，非常好味，連我阿媽都讚佢犀利，我當然好感動！」拍拖後，Ray除照顧她的起居飲食外，還為她做心靈輔導：「我份人好情緒化，平時做嘢壓力大，不過面對人嘅時候唔鍾意表露唔開心一面，但佢會察覺到，盡力同我分憂，令我身心健康！」
秀惠幸福滿瀉，問到何時嫁入豪門？她即耍手說：「唔好咁講，佢好Down To Earth（踏實）！我哋啱啱拍拖，我亦唔係雜誌寫嗰啲女仔，唔需要用錢去衡量一個人！如果同一個好有錢嘅人一齊，但唔開心，我寧願唔要！總之夠使夠食，想去旅行就去旅行，唔使為生活而擔心就OK！」她坦言18歲來港發展時，銀行戶口零存款：「我帶住幾千蚊由馬來西亞嚟香港，香港銀行戶口係由零開始，之後從來冇問屋企人攞過錢！做藝人表面可能好風光，因為衫、化妝甚至首飾都有贊助，我知道搵錢好辛苦，所以我從來都唔大使！」秀惠個性率直、真我，難怪連男友屋企人都很接受她：「佢屋企人好Welcome我，大家會一齊食飯，Ray嘅廚藝咁好，都係跟佢媽咪學，我當然唔敢獻醜啦！」
舊愛篇：「再見亦是朋友」
過去藝人拍拖都要收收埋埋，但近年無綫採取較寬鬆態度，造就陳法拉、曹敏莉及徐淑敏等公開談情，秀惠認為是好事：「依家呢個社會，個個女仔都爭住拍拖，我覺得好正常，大大方方談戀愛，令成個娛樂圈都健康啲！（無綫有冇詐型？）冇！佢哋仲話靚女梗係會拍拖啦！總之唔影響工作就得！其實藝人只係一份工，我哋都要過正常人生活，男朋友都話唔鍾意我化妝，拍拖時要我做番個普通女仔！」
入行7年，秀惠坦言拍過幾次拖，但從未試過如此公開談論一段感情，當中與孫耀威（Eric）的地下情更是不歡而散，有傳她因不忿Eric公然溝女，令她哭崩人前，難得她至今仍力撐舊愛，並煞有介事地說：「我唔想影響人哋！始終大家屬唔同公司，知佢依家搵到另一半（陳美詩）都戥佢開心，祝佢哋幸福快樂！（仲有冇聯絡？）大家各有各忙，好少聯絡！」
秀惠一向予人戀愛大過天，而且非常「黐身」，她揚言要為自己平反：「我唔係淨係識拍拖，反而以前有男友投訴過我，只係掛住做嘢唔理佢！」早前與秀惠分手的馬來西亞男朋友，亦因她要兼顧香港工作才分手：「Timing唔啱囉！因為做嘢好忙，大家溝通唔夠，分咗手都覺得好可惜！希望佢喺馬來西亞搵到適合嘅女仔，可以多啲時間陪佢，不過我哋分手亦是朋友！」
事業篇：「好想搵到目標」
熱情、率直的性格，令秀惠的愛情故事變得精彩，相對而言，事業顯得暗淡失色，她坦言曾為自己前途反思：「去年台慶之後，我返咗去馬來西亞住3個月，想沉澱自己，因為做得太耐，有啲事睇得唔夠清楚，好想搵到一個目標！（想向視后進發？）唔一定要為一個獎，不過希望自己做得一次比一次好！」
秀惠直言媽咪是她最大的支持：「其實我好黐媽咪，不過呢7年好少返家鄉，只係每年返一、兩次，而媽咪更加好少過嚟香港探我，所以今次返到去就嗲媽咪，要佢每隔幾個月就飛嚟陪我！」楊媽媽亦最明白她的個性，從來沒有給予壓力：「咁多年嚟傳過好多緋聞，好似畀雜誌影到我同個外國人一齊，其實對方係爹哋生意上嘅朋友，另一個就係我契哥……媽咪知我性格男仔頭，每次見到呢啲無聊報道都唔會追問，反而令我覺得好Warm！」一個女仔離鄉別井，楊媽媽怎會不擔心！幸現在有Ray在旁照顧，令楊媽媽放下心頭大石。
後記：男友陪運動
楊秀惠樣靚身材正，除有愛情滋潤外，自己都要落一番工夫，她自爆最基本是做運動Keep Fit：「我平時唔偷懶，每周至少做3次運動，仲要搵埋男朋友陪我一齊做，健康都要兩份！」