近年事業一帆風順的甄子丹，新片《葉問2》在港勁收逾三千萬，內地票房更突破二億，但大堆不利傳聞亦衝着他而來。除了盛傳洪金寶對他不滿、葉問兒子葉準對他有微言外，最近又被指拍戲時要求多多。雖然備受是非「打擊」，但子丹卻絲毫沒有動氣，昨日他在北京接受本報訪問時笑言，反而是太太汪詩詩有點不開心。自言在武術界長大的他表示，拍攝武術片是全心推廣武術：「武術界係好多是非，估唔到影圈更甚！依家難得有套電影口碑咁好，大家係咪應該團結啲，而唔係搞是非！」

自認冇Power刪對手戲

子丹強調與洪金寶絕無不和，兩人早前碰面更互搭膊頭，對傳聞一笑置之。提到被指刪減對手戲份，子丹直言啼笑皆非：「我又唔係老闆同編劇，或者我拳腳功夫好有Power，但呢啲嘢我冇Power！」至於葉準師傅，子丹對他老人家尊敬萬分，當不和消息傳出後，他更即時致電對方：「我都唔好意思，就打長途電話同師傅講聲，話拍完電影會再返嚟搵佢食飯。我相信觀眾嘅眼睛係雪亮，我會用行動粉碎謠言！」對於葉準早前受訪時指子丹不應將個人性格加入角色中，子丹說：「每個演員都要將自己同角色融合，咁拍出嚟先好睇。（介意葉準師傅咁講？）唔介意！佢本身又唔係演員。」

捲入是非的葉準昨日接受本報訪問時亦直言對事件摸不着頭腦，直斥造謠者不是：「啲報道好奇怪，由始至終我冇同佢哋做訪問，無啦啦攞張舊相出嚟！條題仲話我鬧人，但內容又話我係敦厚嘅長者，搞到我都精神分裂！」他強調與子丹關係良好：「話我唔想子丹拍第三集，我根本冇講過！佢一向好尊重我，間中搵我飲茶，大家都好珍惜呢段關係。無論人哋點講都好，我哋都會有自己嘅默契，子丹冇可能唔尊重詠春，我信任佢！」