夠晒陽光嘅陳偉霆（William）口甜舌滑好識氹人，同佢一齊做嘢嘅工作人員都話覺得好開心。不過，自從佢同Angelababy分手後，雖然把口話生活依然開心，但成個樣「謝」晒，成日吽吽哣哣發晒呆咁。日前小小So有機會同William傾吓心事，佢終於承認為失戀而唔開心。
小小So：William，做乜你呢排成日都悶悶不樂咁呀？
William：冇呀！可能我由去年開始，接咗好多唔同角色嘅電影，有啲角色性恪好深沉，一時抽離唔到先咁啫！
小小So：真係咁簡單？
William：都可能係成日冇得抖，休息唔夠又冇做運動，有時我都懷疑自己有情緒病，係咪有精神分裂！
小小So：咁同你感情問題有冇關先？
William：可能……係其一啦！但冇唔開心！
小小So：點開解自己呀？
William：做啲鍾意嘅音樂囉！我放開咗o架喇，依家我要回魂，叫自己魂魄返嚟！我喺感情同工作上有迷失過，但依家好番啦，唔使擔心我。