周星馳昨日於廣州出席「《喜劇之王2》星呢選秀大賽」活動，獲司儀以「喜劇之王教父」之稱介紹出場。近年轉攻幕後的星爺表示，希望藉是次選秀為新片《喜劇之王2》選拔演員：「希望可以搵到有創意、有喜劇感嘅新人，內地咁大咁多人才，唔好嘥咗佢！（你會做主角？）我依家係搵人才，搵到人才根本唔需要我。（客串？）都唔會，我鍾意做幕後！」他直言每次與新人拍戲均有得着：「我哋好多時都係互動，當然我會講佢哋應該點做，但我都喺佢哋身上學到好多嘢。」

參賽者落力演出，星爺（右）亦睇到表情多多。

放大圖片

問到當年與栢芝合作時，對方可有教曉他甚麼？星爺聞言深思良久，停頓一會才搞笑地說：「齣戲成十年前嘅事，年紀大要諗諗。印象中佢好有天分，所有嘢都唔係我教，反而係佢教我，呢啲天生嘅，當時拍戲佢仲叫我鎮定啲、唔好緊張。」星爺得悉栢芝再為人母，他坦言希望可找對方客串新片，惟他指對方現時太忙，故未必會答應。

年底內地開鏡

近年星爺御用幕後班底各散東西，問他會否重組？他表示因新片於內地取景，班底會起用內地編劇及導演：「齣戲年底或者明年初開拍，幕後已經定咗，遲啲會公布，當然都會搵田雞（田啟文）佢哋客串。（同小瀋陽合作？）傾緊。」