羅仲謙在劇集《搜下留情》中晒肌，因而人氣急升，但他並未滿足於現時的Fit爆身形：「拍劇前兩、三個月開始操，嗰時推到最高峰，依家40吋度，仲有發展空間，線條可以再勁啲！」他亦樂於大騷身材：「唔介意只着三角褲，之前有電影搵我拍裸露鏡頭，嗰時唔想見到太多肉，前面唔得，但露股就接受，Pat Pat冇咩特別。」他直言吸納男性及同志Fans，比獲女Fans支持更開心，但他堅稱是百分百喜歡女性的，可惜他處於戀愛真空期已達三年，提到擇偶條件，他希望女友身材高挑及體諒他。

想似畢彼特咁型

羅仲謙走「肌男」路線，原來是受偶像畢彼特影響：「佢身形好正，我覺得男演員要有台型，身形係最簡單直接咁騷到有型。」但要Keep住大隻佬外形絕不簡單：「每日操兩至四個鐘，主要係舉鐵，同打波呢啲帶氧運動，做Gym成為生活習慣，有日除衫見到肚腩真係接受唔到！我唔節食，至鍾意食燘肥豬肉，Gym前後食白烚雞柳，雞蛋幾日一隻，仲飲蛋白質沖劑同豆奶。」