童年篇

　問：有冇玩過Barbie或者煮飯仔呢啲遊戲？

放大圖片

Takki (右)

　答：乜Barbie唔係個個女仔都玩過嘅咩？我最鍾意幫Barbie剪頭髮，所以屋企人都以為我第時會做髮型師。煮飯仔我梗有玩啦！我煮嘢好好食㗎！

解讀：多數女仔都會玩，但唔會剪Barbie啲頭髮，煮飯仔嘅玩具係唔食得，你又點知好唔好食？

　問：細個嘅時候有冇試過寫信畀明星？寫畀邊個？

　答：「禮服蒙面俠」算唔算？我好鍾意佢，不過我唔係好記得寄咗去邊，應該兒童節目啩！

解讀：「禮服蒙面俠」好似係卡通人物，但的確迷到好多細路女，我想知你寄嗰封係咪情信，裏面寫啲乜。

飲食篇

　問：食過咩最古怪嘅食物？

　答：第一係豬腦，仲有細個嘅時候Daddy帶過我去珠海食蟲，不過唔記得係咩蟲，但一定唔係禾蟲！

解讀：食蟲諗起都核突，估唔到Takki細細個就咁大膽。

假設篇

　問：遇到朋友有臭狐，你會點樣對付？

　答：叫佢沖多啲涼，之後當面同佢講叫佢做手術除汗腺，覺得咁先幫到佢。

解讀：望就望你身邊啲朋友冇臭狐，唔係實畀你逼去做手術。咁如果有朋友有口臭，唔知Takki會唔會叫朋友去做手術呢？

生活篇

　問：如果喺街度唔小心放咗屁，個個都懷疑係你嘅時候，你會有乜反應？

　答：我會唔出聲，如果佢仲望過嚟，我一定會話「望咩？你唔會放屁㗎？」

解讀：聽落都唔錯，起碼冇咁尷尬，不過你係咪成日都放屁o架？

感情篇

　問：幾歲開始拍拖？

　　　初戀嘅感覺係點？

　答：哈，我初戀喺14歲，不過嗰時細個唔識諗，大家都做啲傷害對方嘅嘢，覺得好傻，不過都拍咗三年o架！但依家真係唔好畀我撞到佢，怕怕！

解讀：所謂再見亦是朋友，點解怕怕呀？咁多年前，撞到都唔認得大家啦！