超雲昨日出席伯爵錶Possession Celebration活動，談到超儀早前寸三、四房子女為給傳媒影相，就算往醫院探父親何鴻燊摸門釘，也沒有所謂，她語帶不屑說：「可能佢唔係咁清楚啲探病時間，佢好忙去得少。（超儀話唔識你？）可能佢語氣有少少問題，我哋真係唔係太熟！」超儀強調媽咪藍瓊纓才是賭王的合法妻子，更稱呼超雲媽咪「阿三」，超雲說：「我冇聽過佢叫媽咪做阿三，大家好少見面。（一家人不受尊重？）就係一家人，所以唔緊要，算！」

「有少少奇怪佢咁講」

超雲透露兩人平日見面也會傾偈，問到是否當超儀是家姐，超雲說：「當。（但佢唔當你係妹？）我當佢家姐咪得囉！（媽咪睇過報道？）有，睇到之後就話算。（媽咪畀人蝦？）唔覺，言語上唔算蝦。」

對於超儀指超雲與超盈「紅」，叫她們幫忙宣傳新戲，超雲寸爆說：「叫佢畀飛我囉！我有睇過佢以前啲戲，今次有少少血腥。（超儀反叛？）唔會，佢係娛樂圈一個角色，體諒佢有戲上要宣傳。（唔開心？）有少少感覺奇怪佢咁講。（見面尷尬？）唔會，報道出街都冇見過佢。（你曝光太多惹妒忌？）唔關事，大家都唔同。（怕繼續有嚟？）我諗佢有分數。（家和萬事興？）係啦！（祝佢票房大收？）希望佢多啲人睇，票房勁！」記者再追問會否想超儀收聲？超雲即忍不住笑，然後大讚：「（呢句）好正！」此外，大會展出不少名人拍攝的慈善照片，而出席的嘉賓包括傅明憲、鄭詩韻夫婦和翁嘉穗等。