栢芝前晚十時許，在養和醫院開刀分娩，順利誕下7磅7安士的肥B。榮升第二任父母的霆鋒和栢芝，自是興奮莫名，霆鋒說：「好開心，最緊要母子平安，我同栢芝好多謝大家關心。」栢芝則透過經理人周小姐說：「多謝大家關心，好開心，希望BB健健康康、快高長大。」

放大圖片	霆鋒前晚抱着Lucas到醫院，昨日卻不見兩父子蹤影，原來已避開耳目在房中陪伴栢芝。

拍廣告搵奶粉錢

據悉，當年大少爺Lucas出世，栢芝花了3萬元留臍帶血，今次二少爺出世，栢芝亦有意為BB留臍帶血，有公司已願意贊助。另外，BB出世後腳頭甚佳，霆鋒下周便拍廣告搵奶粉錢，穩袋7位數酬勞，下半年亦有兩部電影及一齣劇集在手。

拉姑與丈夫鬍鬚Kong（右）昨午到藍塘道和白建時道睇樓。	四哥探望栢芝前，先到跑馬地買外賣。	Lucas前晚探完媽媽及細佬後，乘車返家。

謝賢（四哥）和狄波拉（拉姑）再做爺爺嫲嫲，四哥接受電話訪問時，還詳述栢芝生仔經過：「栢芝尋（前）晚推入病房，以半身麻醉方式生仔，推出病房時眼仔睩睩，相當精神，我問栢芝攰唔攰？佢話唔攰，又問佢做手術嗰陣，有冇喺電視同鏡睇生仔過程？佢話冇。（栢芝生完有冇喊？）冇呀！」四哥激讚新抱是超人，見她精神奕奕，他亦感到安心。

談及第二位乖孫，四哥說：「BB好精靈、肥嘟嘟，比哥哥（Lucas）出世時大塊面，而且有『謝家鼻』，頭髮就少過Lucas。（多唔多人探佢？）間房有成廿幾人。」四哥謂已接了數十個恭賀電話，不少朋友更從美國、加拿大及英國送上賀電，好友嘉玲亦有送花。

另外，四哥接受查小欣《巴巴閉邊個夠我查篤撐》訪問時說：「栢芝生完由姑娘抱住BB，大家睇咗一陣，抱一抱同見一見，之後就抹身。（影相？）有喺產房影，栢芝好精靈，知道成個過程，佢仲話唔痛，我笑佢係咪『生仔機器』，希望佢一路生落去。（龍鳳胎？）最好生多六、七個，咁就冇得頂。」

問到會否封大利是給孫仔？他說：「咁俗！依家興環保，唔講呢啲，好多人送嘢畀BB，唔使我送。」四哥表示B仔肥嘟嘟：「Lucas比較似個檸檬，BB有個謝家鼻，呢個唔可以缺少。（霆鋒搵奶粉錢？）話之佢，養仔嘛！（你會陪栢芝坐月？）睇吓啦！我永不言休。（你拍拖？）秘密，唔話畀人聽。（栢芝幾時出院？）未知，要尊重囝囝，佢係一家之主。」

煲木瓜魚湯補身

本報記者致電拉姑，問到會否煲湯水給栢芝補身？拉姑說：「都係For多啲人奶嘅湯水，好似木瓜魚湯。（花膠同冬蟲草呢？）暫時唔食呢啲。」另外，拉姑、四哥、婷婷、安志杰、楊受成和阿姐汪明荃，昨午相繼到醫院探望栢芝和BB。約傍晚六時，阿姐、婷婷和安志杰先行離開，阿姐大讚BB得意；十分鐘後，四哥亦離開，他表示栢芝在喝湯：「BB似我，真o架！唔係講假。」其後拉姑亦離開醫院：「栢芝幾好，（幾時出院？）要問醫生，霆鋒同Lucas唔走。（諗好名？）暫時叫住『二少爺』，英文名未諗到。」

另外，拉姑與丈夫鬍鬚Kong昨午離開寓所，相約地產經紀到藍塘道和白建時道睇樓，問到是否買樓給孫仔？她哈哈笑了兩聲說：「我去探朋友，好多朋友要探。」至於四哥探栢芝前，先到跑馬地買外賣，他說：「BB好得意，但未知似邊個，未收水，睇唔清楚。」有指栢芝曾搜集安胎食療，但經理人表示栢芝並無接受雜誌訪問。