世界盃決賽周仲有三十日就喺南非開幕,不如搵側田唱番首《三十日》嚟慶祝吓都好喎!講完爛Gag之後,小記都係講番正題!大家唔好以為世界盃唔關娛樂圈嘅事,其實都唔知有幾多歌手明星都係球迷,問起世界盃嘅嘢都答得有板有眼;而佢哋仲預測埋今屆賽事決賽組合,將自己心水話畀大家知!
張學友 對英軍有感情
記︰今屆32支參賽球隊當中,有邊幾隊曾經攞過冠軍呢?講一隊咁多喇!
學友︰英格蘭,因為香港曾經係英國殖民地,所以好有親切感。
記︰好嘢!不過英格蘭捧盃已經係1966年嘅事啦。
詩雅 睇波為PatPat?
記︰亨利早前唔用頭同腳入球,你覺得仲有身體邊部分入波?
詩雅︰不如用Pat Pat同背脊入波,如果球星趷籮入波,我估一定會吸引好多人睇,一定多女fans捧場。亨利嘅身形線條咁靚,不妨用Pat Pat入波,幫法國攞埋世界盃。
記︰荷蘭隊嘅洛賓被指冇頭髮,你寧願一個球星有頭髮冇腳法,定M字額有腳法?
詩雅︰如果我係洛賓,我寧願M字額有腳法,外國靚仔大把啦,同埋踢緊波,電視都唔會影住你個樣,但好波就唔係個個得,所以有腳法係最吸引,個樣醜啲都唔怕啦,佢老婆咪又係好鬼靚女!
鄭伊健 數得出冠軍隊
記︰請數出今屆32強中,曾經捧過世界盃冠軍的球隊。
伊健︰我唔睇波,真係唔知喎!西班牙、墨西哥應該冇,阿根廷、德國捧過,其他真係唔知。
記︰仲有烏拉圭、法國、英格蘭、意大利同巴西呀,你唔睇波,算係咁啦!
杜汶澤 搞錯阿朗素
記︰以下邊位球員屬於西班牙國家隊成員?
A.奧斯禾度阿朗素 B.艾真度阿朗素 C.沙比阿朗素
杜汶澤︰B,艾真度阿朗素
記︰唔啱,答案係C呀!沙比阿朗素踢過利物浦,依家効力皇家馬德里,咁都唔識。
古巨基 認得吉祥物
記︰請問南非世界盃吉祥物Zakumi本身係咩嘢動物?
古巨基︰豹,好似係非洲豹!
記︰好嘢喎,難你唔倒,古Sir!