英國搖滾班霸Deep Purple前晚在機場亞洲國際博覽館開騷，座無虛席。樂隊甫出場，觀眾全場起立，唱至《Smoke on the Water》、《Hush》和《Black Night》等名曲時，氣氛最熾熱，主音Ian Gillan寶刀未老，唱高難度假音冇難度！林子祥、吳浩康（Deep）、顧紀筠和泰迪羅賓等捧場，有父母更帶同小朋友睇騷。
Deep表示早前在內地遺失證件，甫返港即趕往捧場：「我由北京坐火車去深圳補領證件，今次我最感謝我爹哋，佢去咗深圳接我。（女友莊思敏冇去接你？）佢要工作，一個女仔嚟深圳仲擔心。」而莊思敏昨日出席手機活動表示Deep已報平安，又指有女性在火車上請他吃東西。另外，她將在書展出旅遊書，問到怕不怕不夠o靚模撼？她語帶不屑的說：「冇得驚！成個書展都係『波波池』，o靚模冇專長！」
