據知母親節當日，栢芝偕霆鋒及愛兒Lucas到拉姑位於司徒拔道的曉廬慶祝母親節，其後，栢芝留在奶奶家借宿兩晚，至昨晨乘坐另一部車掩人耳目，低調到醫院辦理入院手續，由拉姑寓所到養和，車程不需5分鐘，方便快捷，順利避開傳媒！事後記者致電拉姑，她大讚栢芝精靈：「母親節嗰日新抱仔都嚟咗我屋企，你哋只係影到霆鋒！嗰日我哋圍埋傾，係栢芝諗到條橋，佢話唔想高調，唔想老公揸車送佢入院，所以預先安排架車畀佢，等佢自己靜靜入院！」

講笑話生三胞胎

準備再做嫲嫲的拉姑，昨日5時許與老公鬍鬚Kong到中環置地廣場歎茶，問到栢芝是否昨晨秘密入院待產？她說：「入咗成個月添……如果醫院費收得平嘅話！（擇時辰開刀？）我幾時轉咗行呀？邊識擇日？」問到送甚麼賀禮？她並無回答，但自爆忙着買禮物給昨日生日的「未來女婿」安志杰。拉姑表示未決定為BB改甚麼名，談到有網民取名Focus，她即雀躍地說：「呢個名好得意！（中文名畀相士改？）唔會咯！」

拉姑與鬍鬚Kong離開中環後，傍晚6時半到醫院探望栢芝，傳媒一擁而上，場面一度混亂！心情大靚的拉姑相當合作，與丈夫大方任影。問到栢芝是否生雙胞胎？她開玩笑說：「三胞胎呀！（生咗？）未生，應該聽日（即今日）！你哋畀我上去先！（栢芝咩情況？）佢好好，好食得同瞓得！（擇好日子生BB？）日日都係好日！（係咪龍鳳胎？）1個咋！」晚上8時，她與丈夫離開時表示栢芝仍未生得：「佢情況好好，多謝大家關心！（霆鋒喺醫院過夜？）應該係喇！」

另一邊廂，栢芝經理人周小姐亦對栢芝的生BB日期，以及如何運走栢芝等事相當口密，不過答允只要BB出世，必會將喜訊公告天下。有傳栢芝原定本月10日開刀，最後因某些原因而押後，不過周小姐說：「冇咁嘅事，作得就作！（發BB相畀傳媒？）要睇一家之主（謝霆鋒）喇！」