身形高大的James向來斯文，但原來兒時十分頑皮，他說：「細個已經包包面又細粒，阿媽話我啲頭髮由細到大都係豎起，仲話呢啲小朋友特別曳。我細個嗰陣乜都想試，有次唔聽阿媽勸，懶勁咁行上條又斜又高嘅路，仲要落雨，結果成個跌咗落嚟，後腦縫咗幾針！」自此，James媽為免再發生意外，會花更多時間(昅)實囝囝，James回想與哥哥最怕被媽咪揸住藤條追住打的日子：「成日同阿哥諗計收埋條藤條囉！不過唔知點解阿媽好似有百寶袋咁，喺邊都變到條藤條出嚟！」

James吃到一嘴蛋糕，十足烏嘴狗，可愛又搞笑。	James的童年有美相伴，經常拖實靚女堂妹四圍去。	兒時肥嘟嘟的James，原來相當百厭。

有美相伴扮醫生

James透露家境雖然不富裕，童年時一家四口一間房，但從不覺苦，回想起童年生活更充滿溫情，自細喜歡黐實哥哥的James，亦因對方而愛上踢足球，但哥哥嫌他細粒，出盡法寶撇甩他：「佢會使我入廁所拎毛巾，拎完佢已經出咗門口！之後我學識偷聽佢約人踢波，就即刻換定衫等佢！」

James除了與哥哥結伴之外，身邊還有美相伴，二人更形影不離大玩角色扮演，他笑說：「相入面嗰個係我堂妹，我哋成日扮醫生護士，有乜都兩份分o架！」去年底堂妹出閣，可惜James因工作關係未能親身見證，令他大感可惜：「惟有重錘出擊送番份大禮畀佢，之後睇番佢啲結婚相同成長片段，睇到我眼濕濕呀！」