曾與黎明傳緋聞的李嘉欣，雖然已嫁作人婦，卻不讓樂基兒專美，近日醉心學畫畫，早前更提議與Gaile開畫展，藉此交流心得。Gaile昨日與Janice Man出席BMW荃灣陳列室開幕時，談及嘉欣希望合作搞畫展，她說：「完全唔介意，我覺得佢好Nice，之前喺啲藝術慈善活動見過面，都有傾過偈！」

Gaile（左）昨日與Janice Man出席BMW荃灣陳列室開幕。

擔任司儀的陳霽平盛裝赴會。

Gaile先為嘉欣大笠高帽，大讚她畫畫有天分：「我覺得佢畫畫好有Talent，佢只係啱啱學畫，就好似畫咗好耐咁！」但當問到會否向嘉欣教路時，她即時「起弶」：「唔使啦！佢咁有Talent，總之遲啲睇吓可唔可以一齊搞啦！」

買車等生BB

以一襲Andrew GN低胸短裙亮相的Gaile，與穿上miu miu藍色短裙的JM相映成趣，二人儼如孖公仔，問到是否拍住上？Gaile即放下老闆娘架子笑說：「我陪佢啫！總之同一間公司就係一家人，就有好合作，互相愛大家！」令在旁的JM笑逐顏開！Gaile更表示與JM私交甚篤：「我哋會約出嚟o架，亦會E-mail，大家都有養狗，話題都圍繞呢啲！」

此外，Gaile表示會考慮買旅行車，以備將來生小朋友時用：「如果有小朋友都啱嘅！位都大啲！」母親節將至，她透露可能會返美國探媽咪，但黎明應該未能同行！