中華小姐季軍陳爽最近憑電視劇《女王辦公室》人氣急升，小小So當然要同佢好好慶祝吓兼傾吓近況，期間發現爽爽嘅廣東話進步咗好多，原來佢成日同「同居密友」苟芸慧秘密練兵，仲發生咗好多趣事！
小小So：有咩獨門秘方練廣東話？
陳 爽：以前同苟姑娘（苟芸慧）畀TVB安排一齊住，大家都想學好廣東話，喺屋企都盡量以廣東話溝通，但初時大家都唔知對方講乜，最後決定講番普通話同英文，哈哈！
小小So：你哋「同居」嗰陣應該有好多笑料喎！
陳 爽：係呀！我哋試過喺屋企飲醉咗！
小小So：點解會咁嘅？
陳 爽：因為經理人覺得我哋太乖，叫我哋試吓飲醉酒放縱吓，令演出時感情豐富啲。我哋一次過買咗七支酒，飲到一半已經醉醉哋，仲不停講男仔，最後兩個都醉晒！
小小So：聽講你哋已經分開住？
陳 爽：因為TVB只係提供頭兩年嘅宿舍，之後要各自搵地方住，真係好唔捨得！