英皇地產「維壹」貴賓酒會昨晚於尖沙咀英皇旗艦店舉行，古巨基、黃耀明及陳嘉容擔任「維壹星級大使」，鍾舒漫與陳嘉容齊以Tube Dress示人，泳兒則以性感低胸短裙亮相，配合大會「低調說奢華」的主題，各人以黑白色造型亮相，佩戴由英皇珠寶贊助的「黑鑽珠寶」閃爆登場，連同模特兒身上的黑鑽，全場鑽飾總值逾千萬元。

陳嘉容（左起）、明哥、基仔、阿嬌、張家輝、泳兒及鍾舒漫盛裝出席酒會。

基仔仔細研究豪宅模型，對樓盤大感興趣。

鑽石太貴買唔起

戴上逾130萬耳環、頸鏈及手鏈的阿嬌，貴氣逼人，行頭之勁成為眾人之冠，阿嬌說：「我鍾意鑽石，但太貴買不起！（二千萬買樓都買得起？）所以冇錢買鑽飾！買樓可以保值。今次同媽咪聯名，送畀媽咪做母親節禮物！」獲老闆折扣優惠買樓的她，被問到買珠寶是否一樣有折扣時，她說：「應該有！但儲鑽石未係時候，等年紀再大啲先。（媽咪幫你儲鑽石？）係呀！成日收埋我啲鑽石搞到我搵唔到。」

陳嘉容穿上Tube Dress，分外明艷照人。

明哥由鍾舒漫（左）及泳兒傍實，大享艷福。

身為一哥的基仔戴上黑鑽戒指及襟針，他表示本來想選戴后冠。問到揀選后冠是否要配合一哥身份，基仔說：「后冠留畀將來嘅王后！（你有緋聞王后？）冇！」對父母催婚，問到是否與「王后」有共識，基仔說：「同父母有共識，我都想生BB，但工作忙！（年紀大影響生育？）我有心有力！」提到容祖兒與阿嬌都捧場買入豪宅，他即大賣口乖：「係呀！等埋我！相信老闆會畀個大折扣我，等我送『維壹』畀唯一嘅人！」而黃耀明、鍾舒漫與泳兒均表示有興趣買樓，但要等老闆的大折扣。