楊千嬅昨日以嘉賓身份出席《無翅宴會菜單選擇行動》，對於本報獨家報道其唱片公司老闆決定開新唱片公司「華星」，並簽她做「華星」一姐，有備而戰的千嬅說：「等公司公布啦！過多一星期就有公布，喺我做歌手世界裏面冇一姐，如果係嘅只得梅艷芳先係一姐。（唔想做一姐？）喺我老公心目中我就係一姐！咁仲高興過喺第二啲做一姐。（好得老闆寵？）我喺老公心中係好得寵！」
此外，千嬅承認已約滿Amusic及續約經理人公司，問到Amusic有否與她傾續約？千嬅說：「佢係發行，一路有合作，始終都係老闆公司。」年底補擺婚宴的她表示，為支持大會行動，決定改菜單，不設魚翅菜式：「呢樣嘢值得保育同支持。」
