現年36歲的楊千嬅，去年8月與年輕5歲的丁子高秘密在美國註冊結婚，婚後因未覓得心水愛巢而被迫「分居」，不過，月前千嬅已正式搬入港島區豪宅陽明山莊與奶奶同住。剛完成非洲親善探訪的千嬅，前日趁空檔與老公丁子高到中環拍拖行街。下午約五時，兩公婆戴上情侶黑超現身，並到高級廚具用品店「The PanHandler」購物，不消一會已購下一個價值約六千元的壓力煲及不少廚具，其後丁子高更主動拿着大件的戰利品離開，並轉戰樓下的高級家品店「ALESSI」，甫進店內，即往挑選杯碟及一些小擺設，但不合心水。原本與老公並肩而行的千嬅，當發現記者拍照後，即一改大笑姑婆本色，不時擰歪面耷頭避鏡，其後更前後腳乘扶手電梯離開。

千嬅趁空檔與老公拍拖行街，購買廚具炮製愛心餐。

千嬅發現記者拍照後，即擰歪面避鏡頭，並與老公前後腳乘扶手電梯離開。

未諗BB房設計

事後，丁子高接受電話訪問時表示，千嬅已進駐陽明山莊，問到是否為新居添置家具？他說：「星期日Shopping吓啫！買啲煲同埋啲廚具！（親自下廚？）其實我少啲，佢煮多啲！（佢最拿手煮乜？）佢最叻煮炒蟹同咖喱雞。早排去咗朋友屋企食咗個海參煲，佢見我鍾意食，依家學緊整！」問到會否在新居置BB房？他說：「未諗到咁遠。（千嬅提過演唱會之後全力造人？）如果係就要再設計過BB房！」據知千嬅今次專誠購買貴價壓力煲炮製補腎海參餐谷B，可見二人求子心切。

趕錄碟過檔

剛完成非洲親善探訪之旅的楊千嬅，正趕錄國語大碟，原來為加盟新公司響頭炮。據知千嬅跟黎明揸弗的「Amusic」三年唱片約已屆滿，將正式過檔經理人老闆新Lable「華星」，坐穩「一姐」位置。而千嬅夫婦已定於12月擺酒，因要配合檔期，至今仍未落實日子。目前千嬅仍有多個劇本在手，今年內暫不考慮接戲，會將全副精神放在10月舉行的個唱上，而婚禮則交由老公全權負責。