無綫監製梁家樹個女梁靖琪（Toby）早前被指退出演藝圈，不過以小小So所知就冇呢回事，Toby向來鍾意投資，加上佢喺電視圈做得唔錯，點會咁輕易放棄！
小小So：Toby，最近你啲生意點呀？
Toby：計劃緊開Coffee Shop。
小小So：你唔係已經同家姐開咗間日式放題，最近又搞緊Wedding Planner生意？
Toby：係呀！不過Coffee Shop係想畀父母養老，等佢哋可以歎吓咖啡、收吓錢，有個地方坐吓咁囉！不過仲係計劃，依家仲儲緊錢呀！
小小So：有咩生財之處？
Toby：都係靠自己慳慳埋埋，我12歲就出嚟打工儲錢o架啦！
小小So：真係好生性喎！
Toby：睇住啲錢慢慢咁累積，好開心o架！