英皇地產豪宅「維壹」連日來在銅鑼灣設置示範單位，旗下藝人先後入貨，繼容祖兒後，阿嬌昨午到場睇示範單位，並簽約買入一個千七呎中高層靚單位。據知該樓盤同類單位約售2,700萬元，但阿嬌說：「唔知，我對數字冇乜概念。（老闆畀折扣？）一次過畀一舊錢有九折，老闆仲私人醒多2%，但我仲要供，會好辛苦！」

Juno	阿嬌（左一）與Juno（右一）在優秀選同場，但相距甚遠。

望海味贊助

獲折扣後，阿嬌仍要擲逾2,000萬元置業，30個月後便可入伙，她表示是送給媽咪的母親節禮物，又自爆入住目前的寓所後發展順利，且工作不斷，故已視之為「風水屋」，暫無意搬出。此外，她透露買了一個二千呎的貨倉擺衫，對於有指復出後已賺得千萬元酬勞，阿嬌反應甚大地說：「嘩！邊有賺成千萬呀？依家要供樓要慳啲使，你哋（記者）幫我搵啲贊助，我鍾意飲花膠湯，最好有海味、衫嘅贊助就好。（新居會唔會豪裝？）唔使，本身都好靚，一切由媽咪話事。（同祖兒做鄰居？）係呀，佢住我樓上，傾偈『岳』高頭就得。」

南京醫聲帶

身在南京的祖兒得悉與阿嬌即將成為鄰居，她笑言歡迎阿嬌上門借醬醋油鹽：「我畀咗首期都要供，賺多啲錢畀媽咪過穩定嘅生活。（去南京做嘢？）我搵針灸師醫聲帶，依家好好多，放下心頭大石。」據知與阿嬌齊齊入貨的還有其經理人霍汶希（Mani）及H2O老闆娘余麗絲。

此外，前晚阿嬌與緋聞男友麥浚龍（Juno）同場出席《勁歌優秀選》，阿嬌說：「下晝綵排已經見到Juno，去廁所時都有打招呼，都好耐冇見。（Juno有新戲上，有冇叫佢請你睇？）套戲嘅導演、監製都係我好朋友，要請都係佢哋請先！」