千里馬也要有伯樂，曾咏（Winnie）憑參加《海港城STYLE Model Hunt模特兒大賽》入行，貌似「天王嫂」樂基兒的她，憑六呎身高及淡定表現擊敗其他參賽者，勇奪冠軍殊榮成為熊黛林師妹。氣質溫文大方的Winnie，參賽期間已被看中為國際著名品牌Fendi行騷，令她大呼好玩︰「個騷啲鞋好高，Set埋頭之後變咗高過兩米，不過第一次行騷，同其他專業Model比，仲有好多嘢學。行完之後覺得好有成功感，因為初頭好驚着咁高嘅鞋會扭親或者出洋相，好彩最後都平安無事。加上表演場地係一間餐廳，表演前一日得個零鐘排練，宿舍又冇咁高嘅鞋練習，所以事前都冇咩準備！」

Winnie（左）因參加模特兒比賽而成為熊黛林師妹，前途無可限量。資料圖片

Winnie尚未定下目標，只望隨心出發。

恨拍經典廣告

在港大攻讀微生物學系碩士課程的Winnie，小時候從未想過會當上模特兒︰「細個冇咩特別夢想，屋企畀好多自由我，大學畢業嗰陣原本想去美國讀書，但係覺得香港好啲，所以都留喺香港讀兩年碩士。我覺得讀生物好好玩，好多同學之後都去讀醫做醫生，但係我唔想，因為我唔鍾意見到唔開心嘅事！」她又透露尚未為未來定下目標︰「後生應該試多啲同學多啲，屋企人好民主同開通，將來做邊行都係自己決定，有機會都想去外國試吓行騷，或者拍一個經典廣告，充實人生！」

Profile

姓名︰曾咏（Winnie）

年齡︰24歲

身高︰182cm

學歷︰香港大學微生物學系碩士