擁有34D豐腴上圍的無綫藝人梁政珏，其男友是潮流品牌Ground-Zero老闆Eri Chu，兩人原本愛得癡纏，但Eri早前被本報拍得與薛凱琪（Fiona）在中環夜蒲，他發現記者後竟速逃。據知，梁政珏在報道見街後與Eri吵大鑊鬧分手。

梁政珏上圍「峰」力達34D，其他女模即時被比下去。

梁政珏換上多款泳衣晒魔鬼身材，難怪吸引不少龍友喪影相。

未知是否飽受情傷而大受打擊，曾揚言「封胸」的梁政珏前晚到尖沙咀一間酒吧性感行騷，豁出去換了三件超性感比堅尼Top，吸引不少龍友喪影，而莊思敏亦有捧場。提到近日被拍到與譚詠麟力捧的新人王宗堯行街，她解釋與對方只是好友，並無發展可能。談及現時與Eri的關係，她說：「係好好朋友。（有指Fiona撬牆腳？）當日係大班朋友出去玩，呢啲係好閒嘅事。（同Eri仲係情侶？）我係單身，一向都係單身！（單身幾多年？）三年。」

放大圖片	梁政珏與王晶等消夜，離開時有猛男傍實！

自爆有追求者

問到再遇Fiona會否感尷尬？梁政珏表示大家曾合作，不知對方會否記得她，見面不會感尷尬，問到有否追求者？她說：「有追求者好正常，但冇個啱。」她又透露今次收五位數酬勞行騷，不擔心外界將她與模比較。完騷後，梁政珏到尖沙咀富瑤酒家會合莊思敏及力捧她的王晶消夜，食到凌晨二時許才離開，駕駛50多萬的Benz Jeep返家。疑似三角戀另一主角Fiona受訪時表示，不知道Eri有圈中女友：「同Eri係識咗好多年嘅朋友。（佢哋分手？）根本唔知佢有圈中女友，私事唔過問，報道見街後Eri打畀我Say Sorry，話拖咗我落水。」

另外，身為「四大」歌手的Fiona將會是首位華納歌手，以嘉賓身份亮相亞視《第十五屆十大電視廣告頒獎禮》，她說：「第一次踏足亞視，好開心。（同無綫合約有冇牴觸？）我同無綫冇約。（怕小器？）無綫大台唔會嘅。」華納發言人稱跟無綫冇約的歌手將陸續亮相亞視。而亞視邀得與陳法拉不和的諸葛梓岐擔任「十大廣告」主持，還力邀台灣偶像鄭元暢撐場。