愛情篇

不知不覺，孫耀威（Eric）已踏入37歲，但外表依然年輕、俊俏，加上打扮潮味十足，朋友都給他一個花名「防腐威」！37歲大男孩，事業又有成，這些年來身邊女伴團團轉，可惜都只是曇花一現，他感慨地說：「我每次拍拖都好認真，一心諗住呢個係o架喇！點知又冇咗！」日前被拍得與陳美詩（Macy）在台灣拖手兼咀嘴後，他終大方承認拍拖，看來Macy絕對有機會延續這個「愛的故事」。

媽咪最心急

20歲加入娛樂圈的Eric，多年來傳過與不少女星拍拖，但都未有開花結果，他說：「我屋企好傳統，媽咪由我大學畢業開始，已經叫我搵個女仔拍拖，幾年後就快啲生仔。嗰時嘅我覺得30歲會結婚，到最近，媽咪直情話連鑽石戒指都買埋喇！叫我搵到女仔就同佢講，佢即刻彈粒鑽石畀我去求婚，佢好想我去做呢件事！」

孫耀威曾與楊秀惠甜蜜蜜，可惜一切已成過去。

愛得低調的孫耀威與Macy（右），睇騷都找「電燈膽」。

事業篇

雖說Eric是「防腐威」，但數數手指已入行17年，當年青靚白淨的他，中大畢業後登陸台灣樂壇，人氣直逼勁敵林志穎，其後凱旋回歸，出道半年已有「香港小天王」之稱，其後更獲邀往日本發展，好不風光！不過，他的事業亦非一帆風順，傳他當年遭唱片公司雪藏，又突然走到內地拍劇，回想過來，Eric覺得一切都是經歷：「我覺得我條路好精彩，雖然有好多高高低低，但可以磨練鬥志，係無憾嘅。我去咗咁多地方，見到唔同嘅人，其實有賺。」

出道17年的孫耀威，無論外貌與身形都Stay Young，不枉「防腐威」之名！	放大圖片	當年被封為「香港小天王」的孫耀威（右），與許志安都是頒獎禮常客。

聲帶爆血管

Eric於07年重返香港樂壇，大受歡迎，怎料去年因聲帶爆血管而要休息一段長時間，更一度擔心不能再唱歌：「我返香港之後，大大小小嘅Show都接，乜都做一餐，因為覺得好新鮮，搞到聲帶負荷過重！」無論音響是好是壞，他都嗌破喉嚨滿足Fans，以致聲帶不停出血：「我唱到聲帶慣性爆血管，照入去全部都係血，好恐怖！結果上年年中，醫生話一定要停，否則呢世都唱唔到歌，仲要停年半兩年！」新碟即時叫停，他的心情亦直插谷底：「當時有一百萬樣嘢擔心，唔係錢嘅問題，而係個夢好似破滅咗！」去年10月，他參加公司舉行的演唱會時，突然發現自己奇迹康復，連醫生亦無法解釋。

父子檔鬥波

Eric是家中的長子嫡孫，自覺要為孫家開枝散葉，更一定要生仔：「我好鍾意小朋友，一定會生BB，以前想早啲結婚，係因為想同個仔距離近啲，一齊落街同人哋跟隊打籃球。」不過，30歲的他在內地一劇接一劇，加上男人比較遲熟，終發覺不能「準時」結婚：「當時各樣嘢都未Ready，我仲心諗：『乜眨下眼就30嗱？咁40歲先算啦！』依家30過咗一半，就40喇！」時間不等人，問到女友Macy是否結婚對象，保持低調的他半推半就說：「依家仲有一段時間……」他補充說：「其實搵到個女人好緊要，未到結婚嗰日都唔會話搵到，到時你先知係咪搵到。每次拍拖，我都覺得『係佢喇』，點知最後又失敗咗。」

後記 細細聲保靚聲

經此一役，Eric以後會好好保養靚聲，李克勤還教他以後說話要「陰滋滋」，他說：「養聲好緊要，如果音響唔靚嘅話，我依家學識Say No，唔會唱Live，唔好鬥大聲。」