愛情篇

秘密結婚熱潮席捲娛樂圈，雖然Jessica C.（JC）不介意明目張膽地與男友Sergio纏綿，但亦不排除在熱帶地方秘密結婚，繼Lisa S.與吳彥祖後，相信模界隨時又多一樁喜事！

Jessica早已視Sergio為真命天子，月前更帶他返家鄉見家長。

Jessica與Sergio經常情侶檔出席活動。

向來「戀愛大過天」的Jessica，難明藝人低調拍拖，更直認男友佔據她的生命：「每個人都有唔同嘅戀愛關係同理由，去決定公唔公開情侶關係，我尊重佢哋，所以唔想評論香港藝人點解咁怕交代感情事。我承認蜜運係因為我為戀情自豪，我想大家認識真我，而男友依家喺我生命佔咗好大部分！」

溝通最重要

她深情剖白對男友的愛：「佢陪我走過每一個階段，喺失意嘅時候，佢好似家人咁陪住我，對我幫助好大！」二人保持熱戀的要訣是「溝通」，看似簡單，但偏偏知易行難：「維持感情唔係咁難，我哋好了解對方，平時成日發短訊，一收工就多啲行街拍拖，好似普通情侶咁食飯、睇戲、打桌球，我估秘訣係溝通多啲同零壓力。」

感激Fans信任

Jessica將男友掛在嘴邊，絕不怕得失宅男Fans：「我估我啲Fans係男性居多，喺活動上通常見到男Fans，但行街就有好多少女Fans包圍！我未遇過Fans瘋狂行為，都係收戒指、糖、相同信，所有嘢都好窩心。」除了對男友深情告白，她還對Fans訴說心底話：「我想所有人都知道，我真係好感激每一位Fans，去年我唔知有Fans係咩感覺，只係一心做個被尊敬嘅榜樣，我真係欠佢哋好多，超感激佢哋相信我，令我有動力將工作做到最好，令我覺得咁係有價值！」她如此冧Fans，怪不得宅男不會因她有男友而離她而去。

事業篇

Jessica並非一出道便走紅，17歲來港發展的她，曾拍攝洗頭水廣告，可惜未能突圍，故轉戰亞洲其他市場，直至去年才憑「警鐘胸」在港彈出，更憑打印機廣告入選無綫廣告頒獎禮「最受歡迎女主角」5強，她說：「其實我唔相信所有發生喺我身上嘅事，好震撼！無論贏定輸都係榮幸，個廣告為我開咗好多路，我唔敢奢求得到更多。」

鬼妹仔性格的Jessica，不介意「警鐘胸」成焦點。

放大圖片

八卦娛樂圈

談及娛樂觀眾，不得不提及Jessica的「警鐘胸」，她說：「當傳媒朋友問起我嘅『警鐘胸』，我可以幾自在咁講，因為記者朋友由一開始就陪住我。我個人好隨和，唔會事事擺上心，每次見傳媒，我都係有嗰句講嗰句。」雖然她不懂中文，但亦有留意花邊新聞：「我唔識睇中文，但會睇相，見到得意、有興趣嘅相，就會叫人譯畀我聽，以免同娛樂圈脫節。」

同鄉有照應

模界競爭激烈，但在Jessica身上卻可看到融洽一面：「我欣賞努力工作嘅模特兒，國際Top Model嚟講，我鍾意Gisele，至於香港一線名模，一定係Ana R.同Lisa S.！佢哋都來自美國，但喺香港走紅同建立形象，我成日問佢哋意見，佢哋勁好人同得意，又好肯教我。」

她還打算學廣東話攻影壇：「我好想做演員，當然最想打入荷里活啦！」她還計劃出寫真，目標明確：「我想Target所有人，唔只男性，所以想Hi-fashion同健康啲，反映我真實一面。」

後記 笑容粉飾俏臉

與Jessica談話是一件樂事，從她的打扮及說話，都感受到她很Carefree（優悠），她說：「牌子同價錢唔重要，無論2百蚊定4千蚊嘅衫，我都一樣咁鍾意。配襯就睇心情，用鮮色嘅頸巾、鞋同帽已經好搶，着高踭鞋同戴耳環會高貴同自信，但最重要嘅飾物都係笑容！」