24/04/2010

播放本新聞相關短片

趙碩之體香風褸勝猛男

性感尤物趙碩之,原來每晚睡覺都手腳並用箍實被子,並攬着最愛的風褸進入夢鄉,她笑言充滿其「體香」的風褸比大隻男更有安全感,即使出埠亦會帶在身邊!

生活習慣篇

問:你用咩姿勢瞓覺?

答:我一直鍾意縮埋一舊,細個嗰陣瞓到好似「攣弓蝦米」,大個慢慢變成側睡。另外,可能我冇乜安全感,除咗攬實張被,我仲要攬住件風褸,係嗰種好滑、好似絲質嘅布料,我鍾意佢有自己陣味,攬住會瞓得特別好,所以出埠做嘢都會帶埋佢,試過登台唔記得帶,成個人都好唔舒服!

飲食篇

問:有冇偏食習慣?有咩一定唔食?

答:我超級抗拒茄子同青椒!可能係顏色同質感嘅問題,由細到大都唔鍾意食呢兩樣嘢,但有次做嘢試食有機茄子,感覺又可以接受喎!另外就係唔可以食菠菜,我天生對菠菜敏感,每次食咗,個嘴會好快又紅又腫,所以食嘢會睇清楚,菠菜麵同菠菜批都係陷阱!

童年篇

問:讀書時邊科成績最差?最叻又係邊科?

答:我細個科科攞A,唯獨講故事係C,諗番我依家講嘢咁差,可能都有啲關係。講到最叻梗係體育,我係校隊代表,唔怪得咁恨拍動作片啦!可能因為媽咪係運動健將,所以我同家姐都有運動細胞,跳高、劍擊、籃球同排球樣樣皆精!

個人習慣篇

問:你覺得自己係咪購物狂?

答:都算係,屋企啲嘢多到畀媽咪投訴!其實我唔係唔買嘢唔安樂,但買開嘢就好容易買多幾樣,例如明明去買落妝油,會忍唔住買埋唇膏、眼線筆囉!呢個習慣好難改,所以冇事盡量少去街,尤其係護膚品同化妝品,呢兩樣嘢我都好難抗拒。

影視組