每個歌手讀書嗰陣，都發生過唔少經典趣事，小小So有個死黨，佢同今年再出番唱片嘅跳舞女歌手鄧穎芝（Vangie），原來係中學嘅同班同學！呢位死黨八咗單關於Vangie嘅搞笑嘢畀小小So知，又確係幾抵死！
話說Vangie讀書嗰陣，好似依家啲學生妹咁，會寫信畀鍾意嘅偶像，以表達支持，Vangie都唔例外，不過佢寫畀嘅對象，並唔係大眾偶像，反而係男藝員兼好好打嘅羅莽！Vangie當時純粹開玩笑玩吓，同幾個同學仔寫信畀羅莽，話自己好崇拜同支持佢，點知羅莽原來勁Nice，真係有回信畀佢哋，仲附送幾張親筆簽名型仔相，以多謝佢哋嘅支持，當時Vangie收到羅莽嘅回信後，即時笑到肚都攣，仲搞笑話真係自投「羅莽」！