孫耀威、王敏德、黎瑞恩與王馨平等出席《觀瀾湖世界職業明星高爾夫球邀請賽》記者會，賽事將於十月底在海南進行，大會更邀得荷里活巨星曉格蘭特等拍攝宣傳片，認真巴閉。

日前在台灣被拍得拖着陳美詩的孫耀威，甫出現即被包圍，他尷尬地表示剛在當地參加好友的婚禮返港，並說：「呢幾年我都冇刻意隱瞞感情事，總之影到啲乜咪乜囉！畀人影到我都知知哋，因為有個人成日喺我面前出現，差啲想走埋去問佢係咪記者。（喺當地求婚？）冇呀！（係咪拍拖？）發展中。（都幾年喎！）唔係，係近呢一年，當我病咗嘅時候開始嘅。」他笑言身邊朋友最近排隊結婚，但自己的婚事則會等候上帝安排。

王敏德搵周秀娜擔正

另外，王敏德早前被指在澳門舉行個唱時有美相伴，他解釋：「佢係我新請嘅中英混血兒助手，幫我睇檔期仲睇埋Account，同佢傳緋聞冇所謂，反正佢咁靚！」由於長年運動關係，他表示最近發現右腿十字韌帶斷裂，下月要接受手術治療。提到工作，王敏德透露近日忙於籌拍一部關於飛虎隊的新片，打算找周秀娜擔任女主角﹕「套戲會係英語對白，集香港同美國資金，想搵個荷里活男星做男主角。」