前晚任達華憑電影《歲月神偷》成功作「零的突破」，榮獲今屆香港電影金像獎影帝，前晚他出席慶功宴，昨晨7時則要駕車送囡囡上學，其後即趕往機場赴北京繼續開工，十分頻撲。現場有不少旅客認出這位出爐影帝，紛紛上前邀合照及送上祝福，華哥感恩地說：「我諗今次贏到王老師（王學圻），全靠香港人為我祈禱咋！」

感激太太全心支持

他透露早上囡囡醒來，發現爸爸「變了」影帝，即大叫一聲「哈利路亞」，令華仔甜在心裏。一向甚少提及家事的他，更公然晒幸福：「最想多謝嗰個係太太琦琦，佢喺事業上百分之二百支持我，從來唔會打電話嚟騷擾我拍戲，我遲啲會買份禮答謝佢！」任職警員的父親在他年幼時殉職，華哥三兄妹由媽媽一手帶大，故他對母親深懷感激：「今朝打畀媽咪講咗（得獎），哥哥（前警務處副處長任達榮）依家退咗休，我終於可以提佢多啲，其實佢係我偶像！（帶個獎座去拜吓爸爸？）唔需要，一切在心中！」話雖如此，他計劃明年首執導演筒，並想開拍以警察為題材的電影，向父親致敬。

任達華昨晨現身機場，即吸引不少途人索合照，大受歡迎。

華哥出發往北京開工，並帶同金像獎座跟身。

為友誼決不加片酬

對於有指得獎一刻反應過於平靜，原來華哥心情亦甚為緊張，他說：「大會安排我坐喺正中央，反而王老師坐近台邊，方便上台，當時我心諗對方十拿九穩啦！好彩幸運之神真係眷顧我。（遲來的春天？）依家先至係個新開始，我永不言休。（加片酬？）一定唔會，我有我原則，錢唔代表一切，圈入面贏到嘅友誼先最重要，好似我攞獎，君如仲緊張過我。」

此外，前晚華哥出席《歲月神偷》及《十月圍城》的慶功宴時，先後獲君如及「正印」琦琦獻吻，全場哄動！由於慶功宴在尖沙咀舊水警總部舉行，華哥說：「細個成日嚟呢度等爸爸，感覺好特別。（君如輸咗喎！）唔緊要，遲啲同佢、許鞍華再合作過。」他計劃於北京返港後再相約《歲》片台前幕後食飯「團圓」。