19/04/2010

舒淇拖仔示威

吳彥祖昨晚為免搶主人家風頭,撇下新婚太太Lisa S.獨自出席金像獎,但與三位緋聞女友楊千嬅、舒淇及林熙蕾同場碰面!舒淇翹着另一緋聞男友張震進場,更揚言不會送禮,擺明示威。

吳彥祖(Daniel)與Lisa S.於本月六日在南非結婚,但兩人返港後依然守口如瓶,即使出席活動亦否認已婚,擘大眼講大話!Daniel昨晚以嘉賓身份出席金像獎,但未有與Lisa以甜蜜姿態亮相,只見他獨自出席。提到為何獨自到場?Daniel坦言若拖着太太前來,便會被對方搶風頭:「尊重番啲演員嘛!(結咗婚都唔認,好似講大話喎!)因為畀咗人獨家,唔可以咁早講。」

Daniel盡快做老竇

他表示待完成杜琪峯執導的新片後,預計於七、八月在港舉行結婚派對,屆時必會與老友玩餐飽。曾揚言想做爸爸的Daniel亦表示,希望愈快生仔愈好。提到緋聞女友舒淇有份角逐影后是否支持對方?他亦大表認同:「好!好朋友嘛!」

打扮得靚靚的舒淇則翹着另一位緋聞男友張震行紅地氈,問到與張震一起走是否很開心?她即小鳥依人般把頭倚在他肩膊上,還流露出一副冧樣。提到Daniel月初已婚,原本被工作人員催促入場的她也特別擰轉頭說:「梗有恭喜佢,打Text(短訊)添!都預咗,佢哋一齊咁耐,但唔使送禮物,佢哋咩都有。」

林熙蕾扮聾避走

另一前緋聞女友千嬅則表示頒獎禮前在髮型屋碰面,故再次恭喜對方。對於他一直瞞婚,千嬅即力撐:「佢唔係發料咩?大話呢啲嘢就唔批評,佢哋唔講係有佢原因。」正講得眉飛色舞,但當記者提及Lisa時,身穿七吋高踭鞋的她突然無厘頭拗柴。此外,曾與Daniel傳緋聞的林熙蕾低胸上陣,被問到對方已婚一事即詐聽不到,還愈叫愈走。

Daniel與馮德倫頒發新進導演時互窒,馮德倫取笑他拍《四大天王》時玩盡娛樂圈人,指今次南非結婚會否於一年後又突然說是假,他聞言後讚老友好提議。另外,吳彥祖與Lisa S.在南非秘密結婚,討論區上的網友對瞞婚議論紛紛,有人怒斥兩人講大話,亦有網友送祝福。

影視組