惠英紅出道不久便拍下電影《長輩》，令外界對她刮目相看，勇奪第一屆香港電影金像獎「最佳女主角」。事隔廿八年，她憑電影《心魔》再度提名「最佳女主角」，與吳君如、趙薇、張靜初及舒淇爭影后，她認為各有演技、斤両十足，在提名電影中都能發揮到水準。不過，她自言在《心》片的演技發揮亦不比她們差，故亦看高自己一線：「吳君如係好戲大家都知，我今次都唔差！趙薇好戲又成功改戲路，《花木蘭》佢真係做得好好！至於張靜初，呢個女仔好厲害，仲拍到許鞍華呢個導演直頭冇得頂，有晒天時地利，如果輸係輸在唔夠人生經歷去做個角色。」

年少得獎當草

雖然貴為首屆影后，但惠英紅不會恃強批評，直言若能再拿影后，便是事業上一個圓滿：「第一次攞金像獎影后，當時我得廿歲左右，對個獎冇乜感覺，只係記得當年有人叫我出席頒獎禮，有人叫我個名就上台拎獎，當時乜謝詞都冇講，就咁拎咗個獎落台，返屋企望咗個獎心諗，就係咁咋？值唔值錢o架？完全唔明獎項嘅意義。」隨着成長，在娛樂圈打滾過後，終於明白獎項對演員來說，是一個很重要的肯定。

影后殊榮為惠英紅帶來名利，談及首屆已「絕無僅有」的獎座，她說：「呢個獎座只出現過一屆，當年『最佳男主角』許冠文都話唔見咗，所以個獎好珍貴，個獎好似一個人張大對手好有抱負，加上佢個頭可以360度轉，好似環看四周咁，好有意義。」看着第四屆的那個獎座，她表示造型相當特別，表面凹凸不平又抽象，十足藝術品。至於由第十屆沿用至今、由金像女神手持「東方之珠」的獎座，她相當期待：「呢個最靚，好有線條美，係用銅鑄成，好重手，不過幾重手都好，我都會拎得起，好希望有機會拎呢個獎，對我係一個好大嘅肯定！」