區文詩（Angela）拍過戲、演過舞台劇、做過電台DJ，又試過以組合姿態闖樂壇，兜兜轉轉七年光景，今年終有機會單飛出唱片，她笑說：「我嘅經歷好似食物鏈，環環相扣，今次出碟心情興奮又緊張，依家大個女，唔係以前o衣嘩鬼叫柴娃娃！」

雖然久未出碟，她慶幸唱功並無甩轆：「因為演過舞台劇，又做DJ，亦有去內地登台同唱商場騷，所以唱Live都OK。今次形象會成熟啲、型女啲，唔同以前嘅少女味Image。」

再戰樂壇的Angela，以熟女形象出碟，一洗少女味。

Angela與男友鈴木仁感情穩定，在公在私亦互相扶持。資料圖片

男友執Image

問到男友鈴木仁有否給予意見，Angela說：「佢會畀吓意見，但都係我自己決定，佢好協助我，會幫我襯衫。（叫鈴木仁減肥？）冇乜所謂，都係咁鍾意佢。」對於與吳彤合唱的《愛情不過是場遊戲》反應不俗，Angela坦言有如強心針：「多謝吳彤畀機會我，呢啲係機緣巧合，依家心態唔同，出碟唔係為獎項或銷量，只係為開心，所以冇競爭壓力。」

問到有否與Cookies成員聯絡，她說：「同Stephy（鄧麗欣）、Kary（吳雨霏）同Gloria有保持聯絡。」談及Stephy易惹是非，她說：「佢係心境好平和嘅女仔，EQ又高，好多性格上嘅嘢要向佢學習。（當年九個女仔有冇不和？）相見好同住難，有啲夾、有啲唔夾。（分黨派？）咁又冇，未必個個都熟，大家係同事，冇嗌過交。」