本文重點
朱璇挾08年國際華裔小姐冠軍銜頭殺入影圈,處女作即挑戰自己,飾演育有兩女的中年婦人,演技水準令導演楊凡感動落淚,誰敢說這位80後得個樣?
朱璇在電影《淚王子》中擔正,飾演一名生於50年代,育有兩名女兒的母親:「我同導演楊凡喺朋友介紹下認識,佢問我有冇興趣拍戲,我諗住拍過唔得嘅最多返去讀書,起初驚演得唔好被導演鬧,但楊凡好體貼,每場戲都用心咁教我點做,一次都冇鬧過我,當時我承諾,一定要做好個角色。」能夠提名最佳新演員,相信已有所交代。提到戲中最重要一場戲,朱璇回復可愛本色,大膽笑言覺得對白老土:「我愛你直至海枯石爛……點講出口呀?而且張孝全每次聽到我講呢句對白,都會忍唔住笑,不過到睇戲嘅時候,先發覺原來句對白係好重要,導演真係好犀利!」
導演贊助約仔
朱璇大爆楊凡要她跟男主角張孝全約會,還笑言每次約會的費用,均由他支付:「導演為咗令我哋做到夫妻嗰種默契同真感情,所以佢畀錢我哋單獨約會!有時張孝全要返台北做嘢,導演聽到會唔開心,但係如果張孝全話同我出去玩,導演即刻Say Yes!」對於新人獎,她表示不緊張:「可以入圍已經好好,我哋最想拎最佳美術指導、攝影同服裝造型設計。(睇好邊個拎新人獎?)鍾紹圖,佢好得意,畀個獎佢啦!(投佢一票?)個個都好好,都係投自己好啲,如果新演員獎有五個就好喇!」


