陳法拉憑《LAUGHING GOR之節》以候補身份爭新演員獎，雖然頒獎禮由亞視播映，但她可行紅地氈及上台以廣東話講感受，算是順利踏出影壇第一步！但她指首次公布名單時未能入圍，曾一度失望。

導演邱禮濤曾表示睇好法拉入圍爭獎，他讚法拉一場以死要脅吳鎮宇放過謝天華的戲做得很好，法拉亦表示很難忘，原因是鎮宇的「一滴眼淚」：「我覺得遠鏡拍埋去嗰段做得好，但一到大頭就Kick住咗，始終停咗一輪再拍，情緒未能一時間到位，唔似鎮宇咁，做十幾次都可以去番個情緒，導演話拍大頭戲時，鎮宇有一滴眼淚喺眼度，所以最後用咗大頭。」法拉直言最喜歡的一場戲，是跟天華在船廠逃跑，因她向導演提供了不少意見，而且全被接納，感覺像有份參與創作。對於被邱禮濤讚跑得快，她說：「係呀！我仲跑得快過天華，天華都叫我跑慢啲。」

喜獲鎮宇教路

法拉坦言拍該片時做了不少事前準備：「開工前一、兩日同謝天華上公司傾劇本，當時黃秋生同吳鎮宇都已經拍緊，之後我去探班，死跟住演我哥哥嘅鎮宇，鎮宇都好肯教我，不過佢唔知我戲入面係做個清純女仔，佢話佢嘅角色係黑幫大佬，所以做妹妹嘅我應該可以造型瘋狂啲，可以試吓爆炸頭、着短裙，之後知道我造型係乖乖女，就教我當佢係老竇，因為戲入面，係哥哥養大個妹嘅。」

得到「大佬」鎮宇教戲，又獲邱禮濤力撐，法拉應該很有信心，但她說：「第一次入圍好難講，我覺得朱璇角色好吸引，內心世界好複雜，雖然佢冇攞到一百分，但導演拍得佢好靚！（咁你自己幾多分？）畀自己八十分。」