小小So一直好留意娛樂圈動態，無論電視台、電台、大小商場舉行嘅活動，有時間小小So都會出去同班藝人吹吓水、見個面，所以小小So同唔少藝人幾熟落，好似2R兩姊妹咁，小小So可以講睇住佢哋出道，覺得呢兩個妹妹仔對樂壇好有誠意同熱誠，只係欠缺少少運氣。小小So日前喺一個晚宴上撞到2R，因為大家冇見好耐，一見到即雞啄唔斷，傾到咁上下，Rosanne話要出去接中英混血牙醫老公Derek。
拖住老公入場嘅Rosanne即介紹畀小小So認識，仲話畀老公聽小小So好錫佢，唔講唔知，原來Derek係識聽識講廣東話，仲要好叻添！小小So叫佢努力造人，Derek話：「我成日都好努力。」Rosanne即伸手摸一摸老公胸口，大發嬌嗲說：「你幾時有努力呀！」搞到老公面紅耳赤，氹到小小So鬼咁開心！