在北京擁有不少物業的王菲，有傳日前與老公李亞鵬在成都龍湖長橋郡睇樓，當日阿菲一行十人大陣仗出巡，而售樓處亦嚴陣以待，做好保密工夫，當阿菲夫婦到場後，即禁止其他人士入內睇樓。穿上西裝的李亞鵬友善親民，阿菲將睇樓重任交給老公，而她則安坐在會所看書。李亞鵬先與友人四圍參觀，其後在售樓職員介紹下，參觀多間不同間隔的房子，一行人逗留約兩小時後離開。但另一目擊者則指李亞鵬只是陪朋友睇樓，而王菲則未有同行，李亞鵬經理人親口證實：「當日李亞鵬確實在成都。」但未有透露此行目的。

遭冒名發相

據知，龍湖長橋郡全是頂級獨立別墅，價錢由數百萬元至數千萬元人民幣不等，但以阿菲的天后身價，千萬元別墅可謂「濕濕碎」，單是阿菲早前在春晚獻唱的一曲《傳奇》，網上每日下載量已逾10萬次，收入逾千萬元人民幣。此外，本報昨日收到一封以阿菲經理人陳家瑛英文名「Katie Chen」發出的「王菲在拍MV」電郵，內附三張由高處偷拍的照片，相中戴上頭罩的女子穿上花碌碌服飾行Catwalk，記者向陳家瑛求證，阿菲助手說：「冇咁嘅事，阿菲唔喺香港，冇拍MV！有人冒Katie個名發電郵。」