集合三位扮嘢能手王祖藍、李思捷和阮兆祥的無綫節目《荃加福祿壽》，將於明年農曆檔期搬上紅館！節目雖然被投訴扮女人和醜化宗教，但鬧還鬧，除了成為YouTube熱播區項目外，收視亦很理想，過去一周更高達30點，觀眾人數逾191萬，平了08年無綫台慶頒獎禮的收視，加上在今年的節目巡禮上，《荃》成為廣告客戶反應熱烈的節目之一，受歡迎程度僅次於《巾幗梟雄》第二集《義海豪情》，無綫有見及此，特別將《荃》擺上舞台吸金！

三位扮嘢「達人」目前雖未能藉此來搵真銀，但祖藍卻淡定地表示錢可以慢慢搵，最緊要與觀眾做朋友，大有放長線釣大魚之意；祥仔則較有夢想，他笑言在紅館扮嘢是演舞者的心願，搵錢只是其次；而思捷則認為如果成事會是一件好事，對於「福祿壽」反應理想，他大感開心，揚言是一個好開始。

祖藍扮女人接投訴

對於搬上紅館一事，祖藍承認有傾過，但暫未成事。祖藍說：「有得演梗係去，仲好渴望添！想搵番之前喺節目中扮過嘅嘉賓出席，當大Party咁搞，最想請係欣宜，因為佢係一位好腳，有佢一齊扮，特別開心。（未搵到真銀？）未！想全力做好呢個騷先。（好多投訴話你扮女人？）自己都想投訴埋一分，但百幾萬觀眾想睇我扮女人都冇辦法。」而對扮嘢演出甚有理想的祥仔，得悉會搬上紅館演出，開心得以圓其演舞者心願來形容，並笑說：「呢個係大挑戰，平時喺廠錄影就得八百幾個觀眾拍手，而喺紅館就有萬幾觀眾歡呼，簡直係享受！（收視高？）大家錯愛啦！（有名無利喎？）播咗三集啫！凡事都唔好急功近利。（添食？）我唔想住，都要抖抖！因為一晚試過扮六個造型，如果添食太快，我唔想咁求其！」