陳志雲涉貪事件令無綫掌舵人方逸華勃然大怒，除了陳志雲與錢國偉等被停職外，「志雲幫」亦冇運行。繼第一波清洗崔建邦、鄧健泓及張繼聰等愛將後，上月底曾與志雲飯敍的陳敏之及唐詩詠亦「震過貓王」。至於無綫亦繼續向幕後黨羽開刀，與志雲熟落的《翡翠歌星賀台慶》監製潘裕佳首當其衝食「無情雞」被炒！據知，他於本月8日收到上司何麗全通知被裁，並即日生效。有指方逸華翻查帳目期間，發現去年的《翡翠歌星賀台慶》帳目混亂不堪，身為監製的潘裕佳自然責無旁貸，而他亦坦承曾協助調查，但ICAC自此沒有再聯絡他！加上去年由他監製的《香港小姐》，遭方逸華破口大罵不知所謂，未知是否因此留下被炒伏線。

昨日本報向潘裕佳求證被炒一事，他除了坦承此事外，更預告清洗行動正式展開！

否認報大數

潘：潘裕佳　記：記者

記：有傳你被無綫炒魷？

潘：係！前日收到大信封，TVB理由話公司冇嘢做喎！咁就祝佢哋生意興隆啦！我本身都做到心淡，炒我唔係問題，但佢哋嘅理由好牽強囉！我接受唔到！咁大間機構，綜藝科個個監製都做到嘔，點會冇嘢做，我仲做緊《我的故事．我的歌》，既然用得咁堂皇嘅理由，我都費事拗！佢哋仲同我話炒人會陸續有嚟！

記：有指你被裁員，係關ICAC查《翡翠歌星賀台慶》事？

潘：我負責《翡翠歌星賀台慶》條數冇問題，但背後條數有幾亂就唔知！我負責條數有監管，因為我做之前有做建議書，要上面簽咗先可以做嘢，條數好清晰，唔會亂咁開大數，反而係Under Budget！

記：同ICAC查呢件事有關？

潘：唔覺有關係！就算方小姐查數我都冇問題。

記：今次志雲幫被清洗，咁你係唔係志雲幫？

潘：（苦笑）咁我都算屬於志雲幫，因為我受Philip（陳家揚）重用，而佢又受志雲重用，咁計落都算係！其實我同佢冇乜私人關係！

愛將感愕然

對於潘裕佳被炒，陳志雲愛將鄧健泓愕然地反問︰「係咪阿佳？首先我唔知佢被炒，第二我完全唔認識佢，所以唔回應咁多！（你被飛出《勁歌》，覺唔覺受影響？）我講咗好多次做《勁歌》主持係頂替嘅，依家忙拍劇同環球會幫我出碟！（環球幫你出碟，身份尷尬？）依家我唔會諗太多，總之盡力做好工作。」

至於另一愛將唐詩詠亦大感愕然︰「我係同陳生熟，不過對我工作嘅影響唔大，我喺製作部都算多工作！《鐵馬尋橋》後有《翻叮一族》，6、7月會再開新劇！（《鐵》劇少宣傳，你唔受重視？）我覺得可以啦！當然宣傳係愈多愈好。（潘裕佳助查期間被炒係畀無綫開刀？）我唔清楚，所以唔評論，不過都有啲驚訝！」而潘裕佳上司何麗全與無綫外事部副總監曾醒明至截稿前仍未回覆。