在片中飾演「勁揪俠」的Aaron，被問到如何準備角色時，他說：「我前年八月先試鏡，喺最後一分鐘趕上車！我睇番漫畫原著，揣摩角色說話同打扮，了解佢嘅精神，其實我唔係資深漫畫迷。」對於《蜘蛛俠4》將由新演員出任蜘蛛俠，他表示沒有興趣試鏡，因為他已是「勁揪俠」！

「戰狼」武指助陣

談到拍檔，他說：「尼古拉斯基治喺片場模仿由Adam West飾演嘅電視版蝙蝠俠神態，經常令你爆笑，佢好好人！Chloe係一個專業演員，令你忘記佢得十幾歲。而導演馬修域漢係我嘅好朋友，佢知道自己要咩，從來唔講廢話。」對於Chloe在片中有爆粗及血腥殺人場面，他認為觀眾會喜歡，因為相當有趣！Aaron透露為角色學功夫就像學跳舞一樣：「我哋有好好嘅特技人團隊，有成龍班底、李連杰替身同《戰狼300》嘅武術指導。」

至於在片中飾演「紫天椒」的Chloe談到爆粗戲份時說：「係角色嘅一部分，如果現實中嘅我咁樣講嘢，我會畀人殺！不過我家人好支持我，我啲同學都覺得我個角色好過癮，始終係一部電影！」她又大讚Aaron好人，覺得像她的第二個哥哥，並從尼古拉斯身上學到不少東西。Chloe為電影學了4至5個月功夫，動作場面大都親身上陣。她更視妮妲莉寶文為學習對象，而長大後不想局限演某類角色。