首次拍古裝劇的江若琳，昨日以公主造型現身，她說：「我起初擔心自己個樣太時代，依家睇番效果都OK。劇中我同謝天華、陳鍵鋒、袁偉豪都有感情線，我唔驚傳緋聞，驚忍唔到笑啫！頭先同天華、鍵鋒自拍張相放上微博，微博威力真係好勁，上次我去上海做嘢，上機前影咗張相放上微博，落機後有批Fans嚟接我機，原來係睇咗微博。」謝天華則在劇中與江若琳談情，又與徐子珊有感情線，他說：「唔算艷福無邊，我啲戲同男演員多，不過我都唔惹緋聞！頂多咪傳黐車坐。」

徐子珊飾演青樓老闆娘，預告有性感演出。

馬德鐘（左）和謝天華為爭奪子珊而大打出手。

而穿上透視裝的子珊，預告會有性感演出：「我喺劇中扮青樓老闆娘，會着透視裝，手同背都會透視，古裝嚟講算極限。我個角色同時亦係錦衣衞，但我應該唔使打，跳吓舞，同馬德鐘、謝天華談吓情就OK。（三個都好惹緋聞？）咪仲好，多啲人關注，冇所謂。」

陳鍵鋒冇約志雲飯局

此外，陳鍵鋒被問有否與陳志雲（Stephen）聯絡，他說：「邊個Stephen？（陳志雲！）我有食飯，但冇同佢食，我都冇佢電話，而且佢都離開咗公司。（佢停職唔係離開！）你睇我幾唔清楚件事！講番個劇，今次班底有唔少係《學警狙擊》，係換咗吳卓羲，加入馬德鐘啫！」