歐陽靖(MC Jin)由美國成名再返香港發展,唔經唔覺差唔多有3年,小小So睇住佢由戴住眼鏡、以半鹹淡廣東話做訪問,成日話唔明記者啲「用詞」點解,到今時今日真係進步咗好多,但原來MC Jin唔係得個講字,連寫都考唔到佢。
小小So:最近忙緊咩呀?
MC Jin:都係出席活動,Rap吓唔同題目嘅嘢,次次都好似考我咁,要Rap啲有關主題嘅嘢。
小小So:前排好似又唔見咗你咁嘅?
MC Jin:之前返咗美國做嘢嘛!
小小So:點解唔長期留喺香港作戰呀?
MC Jin:咁有活動搵我去做咪去囉,都要生活嘛,為「莊」來!
小小So:係「將」來呀!
MC Jin:係咩?點寫呀?
(小小So見佢咁有誠意,當然即刻搵張紙寫畀佢睇啦!)
MC Jin:係咪即係「將」軍個「將」?
小小So:係呀!嘩!果然厲害呀!
