狄娜在遺言中說：「刀槍能夠殺人，筆墨可以救人。」「奇女子」狄娜顛倒眾生，其美貌就像筆墨，艷姿就像刀槍。當年她主持介紹電影的無綫節目《蒙太奇》時，與拍檔劉家傑及節目監製李志中爆出三角戀，苦戀狄娜的李志中雖自殺獲救，但直至數年前病逝，仍堅持為女神終身不娶，李志中生前好友、無綫監製徐遇安說：「肥中（李志中暱稱）兩三年前喺香港因病過身，佢冇結婚又冇仔女，走時冇人冇物！當年睇到佢自殺報道好愕然，佢為愛情都好偉大！（佢太癡心？）都幾o架！肥中當年做完《蒙太奇》後移民新加坡，喺當地電視台工作，幾年前退休返香港，喺半山開餐廳，後尾冇做，但始終都冇結婚。（佢有冇同你提過狄娜？）當年我係工程部技術員，佢係導演，雖然傾得埋，但男人之間好少講兒女私情，只係知佢傾慕狄娜。」與李志中同樣稔熟的亞視高層鄭偉強說：「早年我喺新加坡見過肥中兩次，我都有笑佢一把年紀仲係孤家寡人！」

玫瑰花贈佳人

此外，狄娜在遺作《電影－我的荒謬》中，亦提到才子黃霑與她的繾綣往事，她透露黃霑當年不但主動邀約食飯，每次見面更定必帶備一支玫瑰花贈佳人，喜歡講粗口的他，更從未在她面前講粗口，不欲唐突佳人。黃霑女兒黃宇詩昨日就此事回應：「爹哋好少講感情事，我冇見過佢喺女人面前戒講粗口，就算對住我，佢都照講！我知狄娜早幾年出書，搵過我做記者會司儀，但撞期做唔到，覺得好遺憾！」

勒令情敵剃頭

據狄娜在遺作中憶述，當年泰國總理的弟弟亦暗慕其美艷，出資邀請她到泰國拍攝電影，「未夠秤」的她遂報大數申請證件出國，但拍攝期間卻惹來兩位同片男演員Mits及德憲熱烈追求，後者更不惜玩俄羅斯輪盤示愛，泰國總理更勒令Mits剃頭，作為Mits與弟弟爭奪狄娜的懲罰。