陳志雲涉嫌貪污被無綫停職，有傳「志雲派」失勢，愛將鄧健泓首當其衝被飛出《勁歌金曲》主持，昨日他出席電台活動時說：「我一路都係頂替，遲啲會幫TVB拍劇，五月就出碟。（新歌冇得播？）或者喺《勁歌》朗誦歌詞當搞氣氛！」而森美出席另一活動時，認為鄧健泓既是歌手又是主持，角色上可能會混淆，不做亦未嘗不是好事，至於其工作亦未受影響。
另外，早前有份與志雲飯敍的唐詩詠表示不擔心前途：「真係是非停不了！其實我喺TVB冇黨冇派，只希望做好自己本分！」提到有傳與崔建邦復合，她說：「唔講喇！再拍拖都唔公開，學阿Sa話齋想保留一啲私隱。」而王喜昨日在網誌上載志雲出席大學講座的照片，他透露當日部署了四小時，並以「朋友」稱呼志雲。此外，他自言到溫州參加佛教活動，將一整天的功德盡數送給朋友，希望能平息朋友身上的麻煩。