蔡卓妍（Sa）與鄭中基（Ronald）日前開記者會宣布離婚後，外界對離婚真相有不少揣測，除有指Ronald花弗及自殘外，又指阿Sa在媽咪介紹下與內地富豪第二代交往。阿Sa昨晚出席《美麗密令》首映時，一一作出否認，指並非事實不作回應之餘，再三強調離婚不涉第三者，自言要收拾心情，繼續努力工作，不再受失實報道困擾。

導演王晶帶領《美麗密令》演員在台上祝酒，場面熱鬧。

梁政珏（左起）、樊少皇、李曼筠和高海寧盛裝赴會。

昨晚九時許，一身灰、黑打扮的阿Sa，在助手陪同下，乘搭七人車由跑馬地住所前往尖沙咀出席新片首映禮，吸引大批Fans到場打氣，雖然一臉倦容，但在台上與吳君如仍然有講有笑，心情似未受離婚事件影響。

時間證明一切

事後阿Sa接受訪問時說：「近排有好多揣測？之前同Ronald開記者會已經回應晒，唔會再講，唔係事實報道唔回應，日日都有新嘢傳，冇嘢講，時間證明一切。（有傳你媽咪收咗（Ronald）五百萬禮金？）冇，唔係事實。（近期好多負面新聞？）我會承擔後果，唔會再唔開心，會努力工作。（有傳你媽咪係媒人（介紹認識內地富豪）？）其他嘢唔回應，唔係事實。（Ronald係咪自殘？）問番Ronald，不過唔係事實。（有指係傳媒好友爆料？）呢樣要講，佢係我朋友，我冇懷疑佢。（唔係要通緝爆料者咩？）我心中有數，冇話要搵同追究。（爆料人係咪圈中人？）係朋友，唔使交代，唔好傷害身邊人同朋友。」

阿Sa接受內地傳媒訪問。

鄭中基與阿Sa日前開記者會宣布離婚。資料圖片

提到外界對離婚有很多揣測，阿Sa解釋已承認與Ronald因了解而分開，至於有指與內地富豪去年十一月開始拍拖，她沒好氣說：「唔係事實唔回應，你哋問番Ronald。（同Ronald之間係咪有第三者、你係咪有男友？）根本冇咁嘅事。（情緒有冇受困擾？）過埋呢幾日，唔應該唔開心，情緒會好番啲，繼續努力工作。（個樣咁攰係咪瞓得唔好？）覺得自己OK。（有冇唔開心？）唔應該畀失實報道所困擾。」

君如關心好友

另外，昨日出席首映的還有吳君如、李曼筠、梁政珏和詹瑞文等，詹瑞文表示有有傳短訊給阿Sa，對方亦有講多謝，他十分支持兩人開記者會宣布離婚的方法，表現出成熟、勇敢及恰當。

君如被問到有否關心Sa基離婚，她說：「梗係關心，我一見到婚書，第一時間打畀鄭中基，叫佢要盡快作危機處理，但我冇做軍師。（會唔會覺得離婚可惜？）人生就係咁，佢哋喺唔啱嘅時候遇到大家，遇到嘅時候又好浪漫，如果唔係都唔會結婚，我都有叫阿Sa唔好抑壓自己。（信唔信佢哋有第三者？）一定唔信，兩個都唔信，我做呢行咁多年，識睇蛛絲馬迹，兩個都係我朋友，之前又合作過，一定唔會，我信兩個人嘅人格。（信唔信鄭中基自殘？）唔信，傷心一定有，我會借個膊頭畀佢。」