素有「公主」之稱的諸葛梓岐（Marie），昨日以低胸打扮為《CHAUMET Save the Bees活動》擔任模特兒，示範兩套逾百萬鑽飾。她表示已睇中其中一隻價值逾72萬元的名錶，問到會否叫太子爺男友薛嘉麟送贈？她突然「公主病發」並帶笑埋怨地說：「佢人工唔夠我高，睇吓自己買定打畀屋企人。（叫媽咪買？）依家我自己都買得！」

Marie最近與男友的「分」訊傳得似層層，昨日她竟然暗示想分手！當問到是否有顆恨嫁的心？Marie卻無奈地說：「依家冇計劃結婚，我工作會畀到壓力對方，工作冇得揀。（事業行先？）係！（愛情呢？）好Confused（混亂）﹗其實工作辛苦又有壓力，但想工作為先，等到想嫁先再諗。」問到男友是否不喜歡她做這行？Marie說：「我鍾意做呢行，但會令另一半困擾，不如專心工作先，唔使成日畀人問幾時結婚。男友同佢屋企人好支持我同錫我，我有自己諗法。（愛情事業可以兼顧？）唔知，學習中。（暗示分手？）諗緊！睇有乜方法解決。（男友知道諗法？）唔知，係自己諗！我諗緊工作點可以兼顧到愛情，佢又忙時我又忙，雖然我哋好幸福開心，但唔想畀身邊人麻煩。」分手解畫認真模棱兩可。

拒戴刻名情侶頸鏈

另外，提起男友曾送她最珍貴的禮物，Marie說：「愛囉！（有乜代表到先？）冇乜，大家都賺緊錢，心意最緊要。」她表示兩人有情侶戒指及頸鏈，但問到會否戴着刻有對方名字的頸鏈時，她笑說：「狗咩？梗係唔會！感覺好怪，畀小貓、小狗戴就Cute啲。」她又表示媽咪近日買了鑽石鏈給她，作為將來的結婚禮物：「我冇數過有幾多鑽飾，但媽咪最近送咗條鑽石鏈畀我，好閃好靚！我話戴住先，佢就話唔得，要我結婚先可以戴，我就同媽咪講：『扮住結婚先囉！』佢就話我傻。」

事後，記者致電薛嘉麟追問有關Marie欲分手一事，他說：「開緊會，依家唔得閒。」然後匆匆掛線。與Marie傳不和的陳法拉則說：「唔關自己事，唔回應。」

諸葛梓岐（29歲）

背景：本身是中日混血兒，自稱是諸葛亮第63代後人，曾修讀室內設計文憑。

收入：電影加廣告每個月約有六位數收入，加上家人每隔三個月便匯幾十萬元作零用錢，衣食無憂。

薛嘉麟（30歲）

背景：08年取得EMBA學位，身兼中星集團主席及中大印刷行政總裁，同時亦主理Neway業務，最近榮升為新一屆保良局總理。

收入：父親薛濟傑旗下公司市值13億元，家底雄厚。