對於被網友推舉為首席性幻想對象，Chrissie從容應對：「女人做到男人性幻想對象都好好，唔係點叫女人呀？」即使惹來非議，她依然無悔，並坦言若再給她一次機會，依然會挺起胸膛說出同一番話：「雖然有人覺得我咁講唔啱，但我講出心聲！我會諗『後果』，但唔會預計『效果』。我只能夠做到被人追問嘅時候唔好縮，認同自己就要撐，死撐都要撐，第一本寫真集做得唔好，將來一定冇運行！」
踏入25歲的Chrissie於今年書展再度出擊，面對來勢「胸胸」的90後超新o靚模，今年的寫真集極可能成為其「告別作」，故她決定盡地一煲，密謀以SM滴蠟絕招刺激宅男感官、銷量及人氣。出道至今似乎滿肚密圈的她，原來鍾情玩即興，連話題甫士「素顏滴牙膏」亦是神來之筆：「工作要有適當計劃，但世上根本冇必勝方程式。好似上次本寫真集，因為計劃重點係拍Bikini，為咗爭取陽光時間，天未光就埋位等日出，第二晚燥到生唇瘡，但刷牙洗面嗰陣工作人員突然叫我Hold住牙膏，嘩！『乸』到唇瘡好痛！如果係一早計劃好，就唔會生晒唇瘡先影啦！」
事業篇： 成功易寂寞
自2006年開始，Chrissie拍過的電影不多，今年終於首度擔正女主角，在電影《惡胎》飾演一個墮胎後疑神疑鬼，被嬰靈纏擾的女生，Chrissie為角色以素顏黑眼圈上陣，經常歇斯底里，甚至擘髀接受墮胎手術，令性感女神形象蕩然無存：「作為模特兒，各式產品都係以靚行先，我唔介意大家當我係花瓶，但作為演員，我希望在鏡頭前表現出應有專業和實力！喺朋友眼中我唔係花瓶，因為我唔夠靚！我真心想喺娛樂圈發展，任何角色都可以試！」她自言拍恐怖片的最大犧牲是令膽子變小：「以前我夠膽一個人睇鬼片，依家一個人住酒店會瞓唔着，眼光光等天光！」拍鬼片令Chrissie變得膽小，但成功卻令她害怕寂寞。去年九月首次踏足日本市場的她，為人氣時裝騷TGC行天橋，今年三月再下一城，經常獨自飛往日本工作的她坦言，最近一次旅程令她改變：「當晚日本落緊雪，冇巴士去機場，但我要趕搭最後一班機返香港，於是一個人拖住行李搭電車，仲要落錯車，見到其他人一雙一對，突然覺得好寂寞，勁想身邊個有人陪住，最好梗係男朋友啦！」
愛情篇： 甘做小女人
對朋友包容度很高的她，原來對男友很小器，她與髮型師男友Avis拍拖三年，感情有增無減，曾被前男朋友弄得遍體鱗傷的她終學識放手：「與其話放手，不如話係信任，就算管得最嚴，每日都會擔心失去對方，結果辛苦自己，而對方仲係會背叛！（全城幫你睇實男友，你放心？）何嘗唔係全城幫佢睇實我，我都好多人追㗎！」
她又自爆在男友心目中只是「蠢豬」，永遠不及他聰明：「對住佢我好自然變得小女人，唔係扮，我真係蠢！」她又冧爆透露為男友製造浪漫生日：「前年佢生日嗰陣，我叫佢喺屋企門口等，我就入屋將個生日蛋糕放喺大廳中間，然後用洋燭砌成一個心形圍住，但係點着一支洋燭，另一支又會被吹熄，結果佢喺門口發晒脾氣！」不過，男友亦不時為她製造浪漫及驚喜，據知她手機上的閃石正是男友逐粒逐粒替她黐上，獨一無二，彌足珍貴。
性格篇： 傻人有傻福
肯搏肯捱的Chrissie承認為了錢，讀書時期已經開始做數百港元一個Job的兼職硬照模特兒、時薪二十港元的網吧夜更收銀員，畢業後則任時裝店Sales，因為一家六口等開飯：「我有一個哥哥同兩個細佬，雖然我哋喺潮州出世，但冇重男輕女，父母對我哋四兄弟姊妹好公平，要一齊養家，到依家都係成家一齊住，一齊攞錢返屋企。」她回想十歲隨父母來港定居時，蝸居在小小的單位，雖然窮卻很溫暖：「媽媽每次捉住一個嚟鬧，其他三個雞飛狗走，以免殃及池魚！不過都試過細佬受罰，大哥唔忍心就企出來陪罰，我同另一個細佬都跟住出去，如果其中一個畀街外人『恰』，另外三個會聯手對抗！」
自小跟兄弟四處闖蕩，令Chrissie養成男仔頭性格，不拘小節外，對朋友亦有情有義：「朋友對我來好重要，我鍾意熱鬧，尤其係食飯時候就會Call埋成班人。我覺得人總係要有伴侶先算完整，我唔會揀人做朋友，所以成日畀朋友鬧我太易信人，好易畀人呃同搵笨，但我冇所謂，我冇乜嘢可以畀人呃！做朋友最重要信任！」她自言就算被朋友欺騙，亦不會改變性格，因為她相信自己的眼光，更深信傻人有傻福。
後記：我的志願做空姐
雙子座的Chrissie坐唔定，小時候志願是做空姐，因為她嚮往飛來飛去的百變生活，但自從加入娛樂圈後，志願已改變：「依家生活更加多姿多采，每日面對嘅人和事都千變萬化，好刺激！」32D「胸姐」Chrissie放棄當空姐，是宅男們的「福氣」！
On 周秀娜
服裝及場地：GUESS？