緋聞篇：冇做怕乜避忌
模特兒出身的余文樂，外形靚仔及高挑，他試過只穿紅色內褲拍廣告，又試過拍攝超激露毛及露股罅照。入行初期，緋聞多籮籮的他，先後與多位女星包括蔡卓妍、鍾欣桐及黃伊汶傳緋聞，給人感覺花弗。早年與盧巧音（Candy）共譜的「姊弟戀」更轟動一時，惜兩人未能開花結果，甩拖後，Candy製作《好心分手》憑歌寄意，令外界議論紛紛。
隨着時間洗禮，Candy現與樂隊Kolor主音兼結他手Sammy打得火熱，已達談婚論嫁的階段，相反阿樂則繼續做單身寡仔，由過往的緋聞導電體，搖身一變成為緋聞絕緣體，只被拍得郭富城、沈嘉偉和張智霖等「烚吓烚吓」，連他也對此沾沾自喜：「犀唔犀利先？我真係少咗出夜街，就算出街都係約朋友飲嘢同打邊爐。」正所謂「見過鬼怕黑」，問到現時與女星合作會否刻意避忌？他說：「冇話避唔避忌，冇做過怕乜避忌？但只係為他人着想，盡量少啲麻煩。」他坦言現時單身：「真係冇拍拖，就算有，我都唔介意公開，千嬅都結婚，Eason（陳奕迅）都生咗女啦，依家觀眾分得好清楚，不過可以嘅話，梗係偏向低調啦！」談到擇偶條件，他說：「圈內或圈外都冇所謂。」
問到若與Candy或鍾欣桐碰面會否更加避忌，阿樂大方地說：「冇乜避忌，都咁耐嘅事，見面又唔會尷尬。」今年生日便踏入29歲的他，骨子裏是個傳統男人，並希望數幾年後成家立室：「希望30幾歲結婚，真係要遇到一個啱嘅，不過依家嘅問題係我一年可能有幾個月唔喺香港，要周圍飛做嘢，驚分隔兩地會欠缺溝通。」
是非篇：有經歷係好事
伴隨阿樂出道的除了大堆緋聞外，還有一連串的負面新聞。2002年出道的他，被指態度傲慢兼囂張，又與同年新人麥浚龍及蕭正楠傳出不少是非，但他近年明顯「收火」，變得誠懇有禮：「人始終會慢慢長大，有經歷始終係好事，我已經冇咁火爆，冇以前嗰種驕傲！呢幾年見嘅嘢多咗，知道自己其實好渺小，叻極咪又係一個演員，以前好易忟憎，依家收斂咗，少發脾氣，識得去平衡。」
最近忙與楊千嬅宣傳新戲《志明 春嬌》的他，曾拍過電視劇、當過歌手，近年卻專攻大銀幕，經常做「空中飛人」，並由模特兒及歌手轉為偶像與實力兼備的男演員。雖然他有份參演的電影並非每套都大收旺場，卻令他密密賺，而他在電影《頭文字D》的演出，亦令人印象深刻，還憑《頭》片成功打入日本市場，認真叻仔！
事業篇：娛樂圈鬥耐力
阿樂近年戲接戲，收入甚豐，問到是否豬籠入水？他笑說：「OK啦！」由當初《一碌蔗》的稚嫩演技，到近年《妄想》、《塚愛》及《軍雞》等的突破性演出，阿樂的演技備受好評，前年更憑電影《第一誡》開齋，榮獲《韓國富川國際電影節》的「最佳男主角」，初登帝座。對於榮升影帝，他坦言從來沒有想過，並作出詳細分析：「冇諗過呢啲嘢，有時提名入圍好靠機緣巧合，要睇埋同期作品及演員表現，我覺得劉青雲係一個好好例子，佢都係近幾年先攞影帝，但唔代表佢之前演技唔好。」問到對《志》片是否信心爆棚，甚至提名影帝？他說：「真係唔知，我拍得好開心，演員控制部分好少，但呢部戲拍得好流暢，好輕鬆！」對新片寄望甚殷的他，四出落力宣傳：「我本身唔算Aggressive（好勝），但如果要配合新戲宣傳，我梗係去做，仲會勤力啲做，有啲嘢冇話遲唔遲，呢行反而係鬥耐力同耐性！」
曾出過數張唱片的阿樂，其後專注大銀幕演出，令人漸漸遺忘他的歌手身份，但他透露今年打算出唱片，再嘗當歌手的滋味：「因為以前驚做唔晒咁多嘢，自己會兼顧唔到，但依家覺得可以Handle，所以打算再出唱片。」
On 余文樂
髮型：Ben Yeung@Hair Corner
化妝：Jenny Tziong
場地：Nathan Hotel The Bali