有「亞洲第一中鋒」之稱的尹志強（尹佬）上月十六日病逝，終年53歲，摯愛米雪及一眾好友，包括明星足球隊成員譚詠麟（阿倫）、曾志偉、苗僑偉（三哥）及梁漢文，以及摯友黃興桂與洪金寶等，昨日齊齊出席《尹佬惜別日 紀念足球賽》以示悼念。席間，除了播放尹佬生前的片段外，並進行紀念球賽向他致敬。以一身黑色素服打扮及戴上太陽眼鏡的米雪，甫到場即到VIP休息室，並不時與尹佬生前好友握手及擁抱。其後，大會播放愛郎生前的片段，站在一旁的她即目不轉睛地看着屏幕，當播放尹佬生前拍劇的片段時即甜笑，及至播放二人昔日的受訪片段時，米雪即低頭抹淚。接着，手持講稿致悼詞、鳴謝各界，期間不時嗚咽：「尹佬由細到大熱愛足球，令佢發熱發亮！我相信尹佬喺另一個國度都感受到大家嘅愛，作為佢嘅愛人，我為佢嘅成就感到光榮。」

黃日華（左起）、志偉、米雪及阿倫等席地而坐，憶述尹佬生前軼事，可見「人雖逝情永在」。

逾千五名球迷齊集青衣運動場，向「亞洲第一中鋒」作最後致敬。

照稿讀防決堤

事後，米雪感謝球迷及尹佬好友的支持，又透露心情已好轉：「前幾日見過傳媒，頭先特登讀稿，因為就咁講我會忍唔住，依家心情OK！今日咁多朋友喺度，相信尹佬好開心！（睇片嗰陣喊？）少少啦！（睇到尹佬拍劇你笑喎！）係呀！每次演戲佢都好驚，拍每場戲我都喺佢身旁教佢。（你有咩說話想同佢講？）掛住佢，真係好掛！我感覺佢仲喺身邊，因為大家慣咗唔係成日見，所以佢嘅精神好似仲喺身邊！」

米雪展出尹佬廿年前的球衣供影迷拍照留念。	米雪向屏幕上的摯愛鞠躬，不捨之情溢於言表。	志偉輕撫米雪肩膊，希望她能堅強面對往後的日子。

愛犬同月逝世

此外，她表示會繼續將與尹佬的合照放在銀包：「佢仲送過隻狗仔畀我，叫Happy，但隻狗同佢同一個月走埋！（再養新狗？）唔會！（骨灰放邊？）同佢家人商量中。（清明會唔會拜尹佬？）屋企有位，日日對住佢，今日出門口都叫佢快啲嚟睇，會有好多人歌頌佢！」她又表示昨日公開展覽的尹佬球衣已收藏20年：「我好長情，屋企仲有好多套，不過平時有朋友要嘅時候，尹佬都會好慷慨送畀人！」訪問後，她指着布景板上尹佬的照片說：「呢張相我好鍾意，回頭一望，感覺好似好開心咁走喇！」

分屬多年好友的米雪與三哥，抱抱互相安慰。

米雪致詞後，尹佬生前好友紛紛鼓掌以示支持。