蔡卓妍（阿Sa）及鄭中基（Ronald）昨日傍晚於九展開記者會交代「先婚後分」，吸引近百傳媒採訪，他們一起進場，率先並肩讓傳媒拍照，雙手同樣放在背後，神情肅穆，隨後Ronald手持講稿率先發言，內容如下：
「結婚係一個事實！06年我哋兩個非常之咁開心做呢個決定，得到雙方家長支持下喺洛杉磯註冊結婚。一路以嚟，我同阿Sa對於感情同結婚態度，我哋都覺得係我哋兩個嘅私人事，冇需要亦冇必要同大家公開，而我哋雙方都同意呢個處理方法，（阿Sa望住Ronald點頭）我知呢幾年內，外界對我哋雙方關係嘅猜測，同埋不斷失實嘅報道，令我哋兩個覺得係必要有一次交代，亦係今次同最後一次同大家交代！
絕無第三者
喺結婚呢幾年，我哋生活非常之開心，呢段時間大家共同成長，對彼此更加深入了解，發覺分手係對大家日後係比較好啲嘅！所以最近我哋同大家宣布我哋分手，喺好理性之下做出呢個決定，呢個決定亦係一個事實！我再強調一次，我哋嘅分開係冇涉及任何第三者，亦冇涉及一切外間所傳失實嘅報道！
我相信離婚亦係大家將會追問嘅問題！呢件事已經處理緊，而所有法律程序要做嘅嘢，我哋都會做，儘管……（哽咽說不出話，緊合雙唇低下頭流淚，阿Sa即輕拍他慰問）儘管我哋唔能夠成為夫妻（哽咽），但我哋（再度哽咽）的而且確有過一段好開心嘅時間（托眼鏡），以後我哋可以成為永遠嘅朋友（除下眼鏡，用紙巾抹眼淚）！好多謝大家，希望大家可以畀些少空間我哋，多謝！」
再見亦是朋友
Ronald講了約4分鐘後，輪到阿Sa發言：「一直以嚟，同Ronald由開始拍拖到結婚到依家分開，大家都有共識地去做每一樣決定，同埋係兩個人嘅選擇，我哋結婚係兩個人共識下嘅決定，亦得到家人同朋友支持，所以一路以嚟我哋都覺得呢一樣係兩個嘅事情，冇選擇同大家交代，覺得係我哋私事，好想呢個成為我哋小小嘅秘密！
一路以嚟（索鼻），雖然我哋係藝人，以為藝人係有屬於我哋嘅私隱，但係原來……（開始喊），原來藝人係唔可以存在有私隱！（鄭中基伸出左手摸她的大髀以示支持），令到今日件事已經唔係淨係牽涉我哋兩個人嘅事（再度流淚），已經去到一個地步，已經牽涉好多唔同人同事！一路以嚟唔選擇去公開，係因為我哋達成共識保護大家兩個關係、對方、我哋屋企人，但到依家對好多人造成傷害，亦唔希望接住落嚟接踵而來嘅傷害，所以今日我同大家交代呢件事（狂吞口水）！希望嚟緊大家畀多啲空間我同Ronald，咁我哋都係好朋友（Ronald望一望阿Sa並點頭），希望我同Ronald嚟緊都可以生活得好愉快！」阿Sa講了約3分鐘後，二人交代完畢後再度站立，並向台下傳媒鞠躬，最後一同離開，整個記者會歷時約9分鐘。
二人合支費用
另外，阿Sa所屬公司英皇娛樂唱片及藝員管理部總監霍汶希表示公司對Sa基結婚、甚至離婚完全不知情：「公司唔知呢件事，呢啲係藝人嘅私事！公司從來都唔干預，總知公司希望阿Sa得到幸福！」
原本阿Sa打算今日親自交代事件，Mani表示因昨日與阿嬌跟歌迷有聚會，鄭中基則要去成都出席頒獎禮，加上阿Sa感到困擾，想留在家中休息。但最後金牌大風CEO陳輝虹與Mani表示，Sa基已有共識昨日開記者會，場地費用由二人支付。
另外，剛好玉木宏於九展另一場所開騷，現場已有百幾名粉絲準備入場，包括江若琳及HotCha，當得悉基Sa開記者會時笑說：「乜咁精彩呀？」