麥浚龍（Juno）為動畫《馴龍記》配音，為配合片中年輕人的聲線，他經常要提高聲調，每日配音十小時，經過五日的工作，令他有點吃不消：「因為我把聲比較沉，每日都要校高把聲去配都好辛苦，都要飲番啲潤喉飲品補吓！」他透露電影公司從美國派員到現場監督，相當嚴謹及認真，加上對白需要配合英語的口味，故配音過程中難以加入個人情緒及不能「爆肚」。

平日工作繁忙的Juno直言，為動畫配音可暫時脫離煩囂的都市生活壓力，轉投入另一個兒童世界，讓他身心好好休息：「其實配音真係好好玩，會講一啲平時自己唔會講嘅嘢，好似超乎咗現實，變咗另外一個人咁，壓力都冇咁大。」

資料圖片	麥浚龍坦言欣賞蒼井空的專業精神，但認為對方只是工作上的夥伴。

蒼井空裸背拍MV

Juno承認今年將全面在電影方面發展，去年一口氣拍下《維多利亞壹號》及身兼演員、監製、原創故事的《剖術者》，令他大感過癮，他說：「兩部作品都係今年上，嗰種期待心情難以形容。」在《剖》片中他飾演日本女優蒼井空的男友，二人因合作成為好友，蒼井空更留港為其新歌《超生培慾》拍MV，並全裸背部演出，相當落力，Juno說：「拍攝時我都在場，我好欣賞佢嘅專業，我冇用一種歪念去諗人哋，亦唔希望咁樣佔人便宜。」問到有否發展機會，他直指對方性格男仔頭，只會是工作上的拍檔：「咁我又唔排除異地情，但感情呢啲一切隨緣，我最想係可以30歲前生兒育女，唔想有代溝。」