早前G.E.M.到坪洲拍攝宣傳短片，在新城DJ科林的帶領下，她可以食盡、玩盡坪洲，其中最開心的是寓工作於娛樂，奉旨大擦一餐。G.E.M.說：「我食咗海鮮餐同馳名蝦多士，每種食物都好好食，我好似食家，樣樣都試勻。」

踩單車Keep Fit

G.E.M.見每種食物都大快朵頤，一副「寧肥莫缺」的模樣，問她可擔心再變成肥妹，令已展開的減肥計劃毀於一旦，她卻哈哈笑說：「唔使擔心，我會狂做運動，科林一陣就安排我踩單車，我會狂踩，踩到出晒汗、出晒油為止，我返屋企仲會做Sit Up二百下，我好有信心呢種超大嘅運動量，可以抵銷今日所吸受嘅卡路里。」

坪洲風景怡人，G.E.M.大讚是度假的好地方。

G.E.M.與科林走遍坪洲大街小巷，搜羅新鮮食品。

問到對坪洲的感覺？G.E.M.說：「風景好靚，空氣清新，啲人好淳樸，覺得住喺度啲人好會Relax囉！（搬入坪洲居住？）咁又唔會，如果每日要我搭成半個鐘船，再轉車返工同放工，我諗會冇晒時間瞓覺囉！不過坪洲好靚，不失為一個度假嘅好地方，有時間我一定會再嚟玩。」