歡喜冤家張敬軒同王菀之（Ivana），平時做嘢或者接受傳媒訪問時，成日鬥嘴互窒，笑料百出！小小So最近收到風，原來佢兩個迷上分享網站「微博」，一有時間就匯報吓近況，或者打啲無聊嘢隔空互寸。
早排Ivana個音樂特輯播出街，佢喺微博留言叫大家記得留意收睇，身為緋聞男友嘅軒仔當然亦有捧場，但就好抵死咁留言話：「趕返屋企睇佢嘅音樂特輯，睇吓佢係點樣增肥！」仲將兩張一肥一瘦嘅松鼠相放上網作對照，搞笑咁話：「附上王女士嘅玉照供市民參考。」笑到小小So標眼水！
不過，Ivana都唔輸蝕，仲暗中反擊，喺微博上載一張塊面紅晒嘅馬騮相，暗寸軒仔係隻紮紮跳嘅馬騮，仲留言話：「先生！請息怒！看你生氣得全臉通紅，何必呢？不如多寫幾首好歌吧！」被揶揄係「肥美松鼠」嘅佢，似乎唔係好介意，仲自嘲話：「過兩天肥美松鼠必會拜訪府上，請準備豐盛松果餐！」睇嚟軒仔同Ivana前世真係撈亂骨頭，所以今世做一對鬥氣冤家。